Tags-Azal

agarche roz-e-azal bhī yahī añdherā thā
tirī jabīñ se nikaltā huā saverā thā

fitrat hai azal se pābandī kuchh qadr nahīñ āzādī kī
nazroñ meñ haiñ dilkash zanjīreñ ruḳh jānib-e-sahrā kaun kare

roz-e-azal se hai dil-e-vahshī junūñ-pasand
majnūñ ko zauq-e-anjuman-ārā.iyāñ na do

azal siiñ mujh kuuñ diyā dard sāne-e-taqdīr
mire nasīb ke sharbat meñ zahr ghol chukā

zindagī ke dukh azal se zindagī ke saath haiñ
log faanī haiñ magar logoñ ke dukh faanī nahīñ

azal se us kī tabī.at meñ sar-kashī hai 'talab'
kahāñ kisī kī itā.at havā se hotī hai

naqqāsh-e-azal ne to sar-e-kāġhaz-e-bād aah
kyā ḳhaak likhā umr kī ta.amīr kā naqsha

zindagī bevafā azal se hai
phir bhī lagtī hai bā-vafā sī kyuuñ

kartā nahīñ maiñ ḳhushāmad-e-ḳhalq
'hātim' huuñ azal se be-riyā huuñ

maiñ kār-gāh-e-jahāñ meñ azal se huuñ tanhā
na raas aa.ī mujhe mahvashoñ kī qurbat bhī

azal se qismat-e-ādam mohabbat se hai vābasta
jahāñ meñ kis liye phir aah rusvā ho ga.e ham tum

na shab ke gesū sañvar sake aur na din ke ruḳh par nikhār aayā
azal se mashshātgī kā har mudda.ī hai nā-puḳhta-kār shāyad

maiñ aisā bad-nasīb ki jis ne azal ke roz
pheñkā huā kisī kā muqaddar uThā liyā

kis qadar rahmat-e-sāqī-e-azal aam hai aaj
raqs-e-paimāna liye gardish-e-ayyām hai aaj

azal se yuuñ tujhe sab jānte haiñ
koī pahchāntā ab hai na tab thā

jalva-e-roz-e-azal ne mujhe bechain kiyā
pahlī duniyā meñ ye pahlī tirī añgḌā.ī hai

DhūñDhtī kyuuñ na rahe us ko abad tak duniyā
jis ne chhupne kī azal hī meñ qasam khaa.ī hai

ehsās mirā hijr-gazīda hai azal se
kyā mujh ko agar koī qarīb-e-rag-e-jāñ hai

mehnat pe Tuk nazar kar sūratgar-e-azal ne
chālīs din meñ terā mīm-e-dahāñ banāyā

maiñ sab samajhtī rahī aur muskurātī rahī
mirā mizāj azal se payambaroñ sā thā