Tags-Azal

azal se tā-abad yūñhī rahegā ḳhāk-e-mai-ḳhāna
'ġhubār'-e-ḳhasta-o-nākām jis kā naam hai saaqī

jalva-e-husn-e-azal the vo dayār
jin ke ab nām-o-nishāñ yaad nahīñ

azal se shāyad likhe hue the 'shakīl' qismat meñ jaur-e-paiham
khulī jo āñkheñ is anjuman meñ nazar milī āsmāñ se pahle

adā.eñ tā-abad bikhrī paḌī haiñ
azal meñ phaT paḌā joban kisī kā

amr-e-haq harf-e-azal hai to ye fatve kaise
vo na.ī baat nahīñ maiñ koī mansūr nahīñ

'shafīq' mujh ko na ilzām deñ azal se hī
ḳhatā-sarisht hai merī ḳhatā kā putlā huuñ

azal se terī zamīñ par khaḌe haiñ tere ġhulām
saroñ pe un ke vahī āftāb hai maulā

kis kā jalva nazar aayā thā use roz-e-azal
aaj tak nargis-e-bedār kī hairat na ga.ī

judā judā sab ke ḳhvāb ta.abīr ek jaisī
hameñ azal se milī hai taqdīr ek jaisī

yūñhī azal se hai 'amjad' zamīn gardish meñ
kabhī sahar to kabhī raat Dhaltī rahtī hai

ga.e jahāñ bhī vahīñ shahr bas gayā 'ehsān'
azal se apne rahe ham-qadam dar-o-dīvār

anjum se baḌh ke terā har zarra zau-fishāñ hai
jalvoñ se tere ab tak husn-e-azal ayaañ hai

roz-e-azal se tā-ba-abad apnī jaib kā
thā ek chaak jis ko maiñ baiThā siyā kiyā

dil se nikāle jā sakte haiñ ḳhauf bhī aur ḳharābe bhī
lekin azal abad ko 'ādil' kaun nikāle bastī se

mujh se vābasta azal se hai yahī mauj-e-sarāb
kab se maiñ tishna-dahan huuñ tire lab ke aage

kyuuñ diye haiñ tū ne qassam-e-azal
rañj lākhoñ ek jī ke vāste

kyā tīrgī liye hue aa.ī shuā-e-nūr
dekhā shab-e-firāq azal kā likhā huā

az azal tā-ba abad mahv-e-tamāshā honā
maiñ vo huuñ jisko na marnā hai na paidā honā

yazdāñ se bhī ulajh hī paḌā thā tirā 'nadīm'
ya.anī azal se dil meñ yahī ḳhalfashār thā

kisī ke aqd meñ rahtī nahīñ hai lūlī-e-dahr
ye qahba roz-e-azal se hai kuchh talāq-nasīb