Tags-Azal

ai azal jaldī rihā.ī de na bas tāḳhīr kar
ḳhāna-e-tan bhī mujhe ab qaid-ḳhāna ho gayā

samundar chheḌtā hai sāhirāna simfanī jis meñ
navājil devtāoñ ke azal-āsār shañkhoñ kī

azal se jaarī hai tā hashr hī chalegā safar
samay ke sāmne dariyāoñ kī ravānī kyā

azal ke din se añdhere mirā muqaddar the
tirī nazar ne mujhe rashk-e-māhtāb kiyā

mere adam meñ bhī baham thā sitam-e-azal kā ġham
pahle hī maiñ nazār thā aur satā rahe ho tum

ab to hañsī bhī ḳhatm hai afsurdagī bhī ḳhatm
lab-basta-e-azal tujhe kitnā hañsā.ūñ maiñ

hai azal se yuuñ hī tū juuñ kā tuuñ mujhe rafta rafta guzār kar
ye hī silsila shab-o-roz kā ye jo gardish-e-mah-o-sāl hai

vo tak rahe haiñ azal se farāz-e-gardūñ par
nazar kisī ko bhī najm-e-sahar nahīñ aayā

azal ke din se ġham mushtāq thā jo merī ḳhilqat kā
banāyā āñsuoñ se gūñdh kar putlā kudūrat kā

bashar roz-e-azal se shefta hai shān-o-shaukat kā
anāsir ke muraqqe meñ bharā hai naqsh daulat kā

zaḳhm-e-dil-e-shaidā huā achchhā na masīhā
ḳhayyāt-e-azal sil na sakā chāk-e-qafas ko

azal se khaḌe haiñ vafā.eñ liye
kisī ne hameñ āzmāyā nahīñ

ḳhaak zinda gar kare husn-e-azal kī aarzū
darmiyāñ rahtā nahīñ phir koī bhī tār-e-hijāb

mujhe haqīqat se vāsta hai naqīb-e-fitrat huuñ maiñ azal se
ḳhizāñ ko fasl-e-bahār kah duuñ ye merā zarf-e-nazar nahīñ hai

ai hañsne hañsāne vaale jā afsurdagi-e-dil baḌhtī hai
jis ko ho azal se nisbat-e-ġham hañsne se vo ḳhandāñ kyā hogā

mire sivā kuchh nahīñ kahīñ bhī azal abad ek ḳhvāb-e-mastī
zamīñ qadam-bhar hai mere nīche falak nigah-bhar hai aur maiñ huuñ

us ne azal se bhīñch ke rakkhī thī muTThiyāñ
hāthoñ kī har lakīr ke ham tarjumān the

azal se maiñ us ke ta.āqub meñ huuñ
jo lamha mujhe ġhair-fānī kare

bulandiyoñ se utar kar kabhī pukār mujhe
azal se tere karam kā hai intizār mujhe

roz-e-azal se saath hai islām-o-kufr kā
kab dāna-hā-e-sub.ha se zunnār rah gayā