phir mujhe likhnā jo vasf-e-rū-e-jānāñ ho gayā
vājib is jā par qalam ko sar jhukānā ho gayā
sar-kashī itnī nahīñ zālim hai o zulf-e-siyah
bas ki tārīk apnī āñkhoñ meñ zamāna ho gayā
dhyān aayā jis ghaḌī us ke dahān-e-tañg kā
ho gayā dam band mushkil lab hilānā ho gayā
ai azal jaldī rihā.ī de na bas tāḳhīr kar
ḳhāna-e-tan bhī mujhe ab qaid-ḳhāna ho gayā
aaj tak ā.īna-vash hairān hai is fikr meñ
kab yahāñ aayā sikandar kab ravāna ho gayā
daulat-e-duniyā na kaam aa.egī kuchh bhī ba.ad-e-marg
hai zamīñ meñ ḳhaak qārūñ kā ḳhazāna ho gayā
baat karne meñ jo lab us ke hue zer-o-zabar
ek saa.at meñ tah-o-bālā zamāna ho gayā
dekh lī raftār us gul kī chaman meñ kyā sabā
sarv ko mushkil qadam aage baḌhānā ho gayā
jaan dī āḳhir qafas meñ andalīb-e-zār ne
muzhda hai sayyād vīrāñ āshiyāna ho gayā
zinda kar detā hai ik dam meñ ye īsā-e-nafas
khel is ko goyā murde ko jilānā ho gayā
tausan-e-umr-e-ravāñ dam bhar nahīñ ruktā 'rasā'
har nafas goyā usī kā tāziyāna ho gayā