Tags-Azal

mire naale haiñ ki azal abad tire ishve haiñ ki lab-e-masīh
vahāñ kun kā ġhalġhala vo bane yahāñ qum kī ye jo sadā hue

hue vaqt-e-āḳhirī mehrbāñ dam-e-avvalīñ jo ḳhafā hue
vo abad meñ aa ke gale mile jo azal meñ ham se judā hue

kuchh na kuchh is anjuman meñ hasb-e-hāl
tū ne qassam-e-azal sab ko diyā

ye kyā andāz-e-qassām-e-azal thā kyā navāzish thī
mire hissa meñ le de kar hayāt-e-musta.ār aa.ī

ḳhār-e-mardūd-e-chaman mujh ko kiyā roz-e-azal
jin ne bhejā hai tujhe gūna-e-gulzār ke saath

azal se gūñjtā manzar hai hastī
sadā do jism kī be-chehragī ko

azal se loTte añgāroñ par ham aa.e haiñ
hai kab tak aur abhī imtihāñ nahīñ ma.alūm

maiñ azal hī se samajhtā huuñ tujhe apnā 'azīz'
ye tirī fitrat ki tū dāman-kashāñ hai aaj bhī

Daal dī sāqī-e-kausar ne azal se 'rif.at'
bāda-e-ishq-o-mohabbat mire paimāne meñ

pujāriyoñ ke liye azal se taḌap rahe haiñ
samay ke pahlū meñ kitne asnām kaun jaane

sirisht-e-dil meñ kis ne kuuT kar bhar dī hai betābī
azal meñ kaun yā rab mujh se baiThā thā ḳhafā ho kar

vaqt ke sahrā meñ tum pāoge mere naqsh-e-pā
maiñ azal se tā-abad ik silsila ho jā.ūñgā

gadā-e-nutq bhī maiñ ḳhāliq-e-azal ke huzūr
aur apne dard kī āvāz kā ḳhudā bhī maiñ

roz-e-azal se vo bhī mujh tak aane kī koshish meñ hai
roz-e-azal se maiñ bhī us se milne kī koshish meñ huuñ

na kunisht o kalīsā se kaam hameñ dar-e-dair na bait-e-haram se ġharaz
ki azal se hamāre sajdoñ ko rahī tere hī naqsh-e-qadam se ġharaz

mar jaa.eñ pa shikve kī kabhī baat na nikle
ye hoñT vo haiñ jin meñ azal se hai palī chup

mire pahlū meñ dil hai to yaqīnan
azal hī se magar TuuTā huā hai

maiñ azal tā-ba-abad aur abad tā-dā.im
is kā matlab maiñ kisī ek zamāne kā nahīñ

'baḳhsh' sayyād-e-azal ne hukm-e-āzādī ke saath
aur asīrī ke bhī ḳhadshe dal ke andar rakh diye

chand zarre ḳhāk-e-ādam se azal meñ bach ga.e
fitrat-e-ma.asūm ne in se banāyā dil mirā