jo jhuTlātā rahā hai zindagī ko
zarā pahchān leñ us aadmī ko
ujāle bāñTtī phirtī hai duniyā
syāhī se ulajhtī raushnī ko
azal se gūñjtā manzar hai hastī
sadā do jism kī be-chehragī ko
na dekhā tum ne saḌkoñ se guzarte
bikhartī saañs letī zindagī ko
nahīñ mohlat ki maiñ ḳhurshīd detā
tirī āñkhoñ kī bujhtī raushnī ko
jo hai is shahr meñ munkir suḳhan kā
sunāo ye ġhazal 'sāqib' usī ko