Tags-Azal

kis taur se āḳhir unheñ tasvīr kareñ ham
jo ḳhvāb azal se koī chehra nahīñ rakhte

ik lamhe ne mujh se kahā thā tū hī azal hai tū hī abad hai
lamha biitā baat ga.ī is ḳhvāb se kab kā chauñk uThā huuñ

yahāñ makāñ hai to kyuuñ āsmāñ kī sair kareñ
makīñ haiñ 'shād' azal se isī zamīñ ke ham

dil azal se hai sho.ala pairāhan
sham.a jaltī hai rāt-bhar ke liye

azal se aaj tak koī na samjhā
hayāt-e-muḳhtasar kyā sho.abada hai

jo azal hī se muqaffal hai vo ghar kholegā
aaj vo mere liye sātvāñ dar kholegā

hai khel jaarī azal se ye auj-o-pastī kā
uruuj jis kā kabhī thā zavāl hai us kā

azal-e-dāstāñ se is dam tak
jo bhī guzrī ik aan meñ guzrī

hazār naḳhl-e-gumāñ haiñ abhī numūd-āsār
azal ke din se hai kisht-e-yaqīñ daroġh daroġh

mai-ḳhvāriyāñ gunāh sahī sāqī-e-azal
jab abr jhuum jhuum ke aa.e to kyā kareñ

ishq hai ik ātish-e-dil-soz meñ jalne kā naam
ham ko to roz-e-azal ye baat samjhā.ī na thī

jhuk ke milne kī azal hī se hai fitrat 'shā.iq'
garche sar-basta-e-dastār-e-anā huuñ maiñ bhī

bedāriyāñ haiñ dīda-e-zanjīr kī tarah
vo aañkh hai azal se jo mahrūm-e-ḳhvāb hai

qulzum-e-ḳhūñ na az-azal Thahrī
is zehānat kā fā.eda kyā hai

ye kaisī āvāz hai jis kī zinda guuñj huuñ maiñ
sub.h-e-azal meñ kis ne 'amjad' mujhe pukārā thā

azal ho yā abad donoñ asīr-e-zulf-e-hazrat haiñ
jidhar nazreñ uThāoge yahī ik silsilā hogā

azal ke qissa-go ne dil kī jo utārī dāstāñ
kahīñ kahīñ se us ne to bahut sañvārī dāstāñ

sub.h-e-azal se shām-e-abad tak mere hī dam se raunaq hai
is manzar se us manzar tak us manzar se aage bhī

maiñ azal kā rāh-rau mujh ko abad kī justujū
gard-e-rah mere jilau meñ saath mere maiñ na tū

azal ke roz hameñ kaun se vo tohfe mile
ki ham se dahr ne badle ginā ginā ke liye