Tags-Azal

maiñ ne usī se haath milāyā thā aur bas
vo shaḳhs jo azal se parāyā thā aur bas

azal se fitrat-e-āzād hī thī āvāra
ye kyuuñ kaheñ ki hameñ koī rahnumā na milā

māntā huuñ ki hai zulmāt-e-azal us kā nasīb
raat kī zid hai use apnī fuġhāñ tak dekhūñ

udhar vo dasht-e-musalsal idhar musalsal maiñ
vahī azal kā vo saaya vahī ye pāgal maiñ

azal meñ jo ik laag tujh se huī
vo āḳhir ko dāġh-e-abad ho ga.ī

kāsa-e-dil ko mujalla aur kar luuñ to chalūñ
darḳhur-e-husn-e-azal kab hai ye nazrāna abhī

sun rahe haiñ qissa-e-ādam azal se ham magar
hai vahī kaifiyyat-e-āġhāz-e-afsāna abhī

'dānā' mujhe azal se ġhazal kī talāsh thī
ye merī zindagī kī adā kā savāl thā

azal se ek hī nuqsān khā rahā hai mujhe
azal se ḳhud ko faqat rā.egān rakhtā huuñ

mehnat pe Tuk nazar kar sūrat gar azal ne
chālīs din meñ terā mīm-e-dahāñ banāyā

azal ke din se haiñ ham mast-e-jalva-e-sāqī
hamāre sāmne kis roz āftāb na thā

suno insāñ huuñ
aur roz-e-azal hī se

ai shātir-e-azal tire hāthoñ ko chuum luuñ
qarye meñ mere naam jo dīvāna-pan paḌe

aql har ḳhvāb kī ta.abīr ke pīchhe bhāge
dil azal hī se hai āshāoñ ke pīchhe pīchhe

maiñ bistar-e-ḳhayāl pe leTā huuñ us ke paas
sub.h-e-azal se koī taqāzā kiye baġhair

rahā huuñ muntazir jis kā azal se
vahī chehra mire afkār meñ hai

zabāñ pe rindān-e-kam-nazar kī shikāyat-e-sāqī-e-azal hai
talab sivā ho jo zarf dil se havas hai vo tishnagī nahīñ hai

is jazīre par azal se ḳhaak uḌtī hai havā
manziloñ ke bhed phir bhī rāstoñ meñ qaid haiñ

maiñ azal se sunātā rahā huuñ magar
nā-mukammal mirī dāstāñ hai abhī

kab kaun kahāñ kis liye zanjīr-bapā hai
ye uqda-e-asrār-e-azal kis pe khulā hai