Tags-Azal

azal se soī hai taqdīr-e-ishq maut kī niiñd
agar jagā.iye karvaT badal to saktī hai

roz-e-azal ke mast ko piine se kaam hai
us kī nazar meñ hurmat-e-māh-e-siyām kyā

azal se thā vo hamāre vajūd kā hissa
vo ek shaḳhs ki jo ham pe mehrbān huā

baḌī bechārgī niklī bahut hī nārasī paa.ī
azal ke roz baḌh kar le to lī thī bandagī ham ne

hai mujh meñ aur kohkan-o-qais meñ ye farq
maiñ vahshī-e-azal huuñ ye dīvāne haal ke

tū dard-e-mohabbat kā talabgār azal se
tū mehr-o-muravvat kā parastār azal se

azal ke roz se arsh-o-malā.ik sajda karte haiñ
koī to baat hai ai 'ārzū' tarkīb-e-insāñ meñ

azal ke din jinheñ dekhā thā bazm-e-husn-e-pinhāñ meñ
simaT aa.eñ vahī ra.anā.iyāñ tasvīr-e-jānāñ meñ

kam na thā ishq azal se rusvā
kar diyā aur bhī rusvā ham ne

kyā dikhā.eñ ḳhushk lab do buuñd ke saaqī haiñ sab
pyaas sahrā-e-azal us ko samundar chāhiye

maiñ agar miltā na us se is azal kī shaam meñ
ḳhvāb in dīvār-o-dar kā dil meñ kaise jāgtā

usī ne aadam ke naqsh-e-pā ko azal kiyā thā bharam rakhā thā
zamīñ pe jalva-fagan na ho kar bhī jis ne pahlā qadam rakhā thā

sub.h-e-azal kā ruup ki shām-e-abad kā giit
saaya ho dhuup ho ki gumāñ kuchh na kuchh to ho

evaz-e-hijr na luuñ aish tamām aalam kā
hai azal se mujhe farmān-e-hakam donoñ ek

azal se maut ne ab tak ka.ī qālib badalvā.e
magar jo choT thī dil meñ vahī mahsūs hotī hai

tere jabīñ se nūr-e-husn-e-azal ayaañ hai
allāh-re zeb-o-zīnat kyā auj-e-izz-o-shāñ hai

ufuq ke paar azal se ik aag raushan hai
ye saarā khel hai us aag ke sharāre par

parda-e-e'tibār-e-ġhair pairahan-e-ḳhudī hai chaak
husn-e-azal hai jalva-rez sadma-e-dil-gudāz meñ

sub.h-e-azal hai sub.h-e-husn shām-e-abad hai dāġh-e-ishq
dil hai maqām-e-irtibāt silsila-e-darāz meñ