ai ḳhāk-e-hind terī azmat meñ kyā gumāñ hai
dariya-e-faiz-e-qudarat tere liye ravāñ hai
tere jabīñ se nūr-e-husn-e-azal ayaañ hai
allāh-re zeb-o-zīnat kyā auj-e-izz-o-shāñ hai
har sub.h hai ye ḳhidmat ḳhurshīd-e-pur-ziyā kī
kirnoñ se gūñdhtā hai choTī himāliyā kī
is ḳhāk-e-dil-nashīñ se chashme hue vo jaarī
chiin o arab meñ jin se hotī thī ābiyārī
saare jahāñ pe jab thā vahshat kā abr taarī
chashm-o-charāġh-e-ālam thī sar-zamīñ hamārī
sham-e-adab na thī jab yūnāñ kī anjuman meñ
tābāñ thā mahr-e-dānish is vādī-e-kuhan meñ
'gautum' ne aabrū dī is ma.abad-e-kuhan ko
'sarmad' ne is zamīñ par sadqe kiyā vatan ko
'akbar' ne jām-e-ulfat baḳhshā is anjuman ko
sīñchā lahū se apne 'rānā' ne is chaman ko
sab sūrbīr apne is ḳhaak meñ nihāñ haiñ
TuuTe hue khañDar haiñ yā un kī haDDiyāñ haiñ
dīvār-o-dar se ab tak un kā asar ayaañ hai
apnī ragoñ meñ ab tak un kā lahū ravāñ hai
kashmīr se ayaañ hai jannat kā rañg ab tak
shaukat se bah rahā hai dariyā-e-gañg ab tak
aglī sī tāzgī hai phūloñ meñ aur phaloñ meñ
karte haiñ raqs ab tak tā.ūs jañgaloñ meñ
ab tak vahī kaḌak hai bijlī kī bādaloñ meñ
pastī sī aa ga.ī hai par dil ke hausloñ meñ
gul sham-e-anjuman hai go anjuman vahī hai
hubb-e-vatan vahī hai ḳhāk-e-vatan vahī hai
barsoñ se ho rahā hai barham samāñ hamārā
duniyā se miT rahā hai nām-o-nishāñ hamārā
kuchh kam nahīñ ajal se ḳhvāb-e-girāñ hamārā
ik lāsh-e-be-kafan hai hindostān hamārā
ilm-o-kamāl o īmāñ barbād ho rahe haiñ
aish-o-tarab ke bande ġhaflat meñ so rahe haiñ
ai sūr-e-hubb-e-qaumī is ḳhvāb se jagā de
bhūlā huā fasāna kānoñ ko phir sunā de
murda tabī.atoñ kī afsurdagī miTā de
uThte hue sharāre is raakh se dikhā de
hubb-e-vatan samā.e āñkhoñ meñ nuur ho kar
sar meñ ḳhumār ho kar dil meñ surūr ho kar
shaidā-e-bostāñ ko sarv-o-saman mubārak
rañgīñ tabī.atoñ ko rañg-e-suḳhan mubārak
bulbul ko gul mubārak gul ko chaman mubārak
ham be-kasoñ ko apnā pyārā vatan mubārak
ġhunche hamāre dil ke is baaġh meñ khileñge
is ḳhaak se uThe haiñ is ḳhaak meñ mileñge
hai jū-e-shīr ham ko nūr-e-sahar vatan kā
āñkhoñ kī raushnī hai jalva is anjuman kā
hai rashk-e-mahr zarra is manzil-e-kuhan kā
tultā hai barg-e-gul se kāñTā bhī is chaman kā
gard-o-ġhubār yaañ kā ḳhil.at hai apne tan ko
mar kar bhī chāhte haiñ ḳhāk-e-vatan kafan ko