saarā baaġh ulajh jaatā hai aisī be-tartībī se
mujh meñ phailne lag jaatī hai ḳhushbū apnī marzī se
har manzar ko majma.a meñ se yuuñ uTh uTh kar dekhte haiñ
ho saktā hai shohrat pā leñ ham apnī dilchaspī se
in ā.ankhoñ se do ik aañsū Tapke hoñ to yaad nahīñ
ham ne apnā vaqt guzārā har mumkin ḳhāmoshī se
barf jamī hai manzil manzil raste ātish-dān meñ haiñ
baiThā raakh kured rahā huuñ maiñ apnī baisākhī se
ḳhvāboñ ke ḳhush-hāl parinde sar par yuuñ mañDlāte haiñ
duur se pahchāne jaate haiñ ham apnī be-ḳhvābī se
dil se nikāle jā sakte haiñ ḳhauf bhī aur ḳharābe bhī
lekin azal abad ko 'ādil' kaun nikāle bastī se