duniyā bhī ajab qāfila-e-tishna-labāñ hai
har shaḳhs sarāboñ ke ta.āqub meñ ravāñ hai
tanhā tirī mahfil meñ nahīñ huuñ ki mire saath
ik lazzat-e-pābandī-e-iz.hār-o-bayāñ hai
haq baat pe hai zahar bhare jaam kī ta.azīr
ai ġhairat-e-īmāñ lab-e-suqrāt kahāñ hai
khetoñ meñ samātī nahīñ phūlī huī sarsoñ
bāġhoñ meñ abhī tak vahī hañgām-e-ḳhizāñ hai
ehsās mirā hijr-gazīda hai azal se
kyā mujh ko agar koī qarīb-e-rag-e-jāñ hai
jo dal ke samundar se ubhartā hai yaqīñ hai
jo zehan ke sāhil se guzartā hai gumāñ hai
phūloñ pe ghaTāoñ ke to saa.e nahīñ 'anvar'
āvāra-e-gulzār nasheman kā dhuāñ hai