Tags-Azaab

hayāt dard kī tuġhyāniyoñ meñ Duubī hai
ġham-e-habīb bhī hai ziist ke azaab bhī saath

ye fāsloñ kī haqīqat ye qurbatoñ kā tilism
azaab haiñ ye ta.alluq ke ḳhvāb āñkhoñ ko

qavī bhī hai za.iif bhī hamārā hāfiza 'shu.ūr'
maze tamām yaad haiñ azaab ek bhī nahīñ

kabhī rahmateñ thiiñ nāzil isī ḳhitta-e-zamīñ par
vahī ḳhitta-e-zamīñ hai ki azaab utar rahe haiñ

hujūm-e-dard milā zindagī azaab huī
dil o nigāh kī sāzish thī kāmyāb huī

har ek aañkh ko kuchh TuuTe ḳhvāb de ke gayā
vo zindagī ko ye kaisā azaab de ke gayā

har saañs se aa rahī haiñ lapkeñ
har lamha azaab ho gayā hai

maiñ khurachtā huuñ hathelī se lakīroñ kā azaab
ik sitārā mujhe mehvar kī taraf khīñchtā hai

is shahr-e-fusūñ-gar ke azaab aur, savāb aur
hijr aur tarah kā hai, visāl aur tarah kā

kabhī sharābī kabhī namāzī kabhī huuñ maiñ rind-gāh zāhid
ḳhudā kā Dar hai butoñ kā khaTkā ajab tarah ke azaab meñ huuñ

jin parindoñ ko uḌnā aatā ho
un pe pinjre azaab ho jaa.eñ

kitnā baḌā azaab hai bātin kī kashmakash
ā.īna sab kā garmī-e-jauhar se kaT gayā

sambhal hī leñge musalsal tabāh hoñ to sahī
azāb-e-zīst meñ rashk-e-gunāh hoñ to sahī

sarāb tishna-labī dhuup ābla-pā.ī
ḳhayāl pichhle safar kā azaab thā ki nahīñ

yād-e-māzī azaab hai yā-rab
chhīn le mujh se hāfiza merā

mohabbatoñ ke sarāb jhele rafāqatoñ ke azaab jhele
kisī kī yādoñ meñ ro rahā huuñ mujhe duāoñ meñ yaad rakhnā

jab bhī barsī azaab kī bārish
raas aa.ī sharāb kī bārish

maiñ kaise tujh ko pukārūñ kahāñ se lā.ūñ tujhe
tire baġhair agar zindagī azaab lage

mushkil hai imtiyāz-e-azāb-o-savāb meñ
piitā huuñ maiñ sharāb milā kar gulāb meñ

ġham-e-jānāñ to rāhat-e-dil hai
fikr-e-duniyā azaab hai yaaro