dil be-tab-o-tāb ho gayā hai
ā.īna ḳharāb ho gayā hai
har shaḳhs hai ishtihār apnā
har chehra kitāb ho gayā hai
har saañs se aa rahī haiñ lapkeñ
har lamha azaab ho gayā hai
jis din se bane ho tum masīhā
haal aur ḳharāb ho gayā hai
hoñToñ pe khilā huā tabassum
zaḳhmoñ kī naqāb ho gayā hai
sochā thā to ishq thā haqīqat
dekhā hai to ḳhvāb ho gayā hai
'qaisar' ġham-e-zindagī simaT kar
ik jām-e-sharāb ho gayā hai