Tags-Azaab

ḳharāba aur hotā hai ḳharāb āhista āhista
dayār-e-dil pe aate haiñ azaab āhista āhista

yuuñ musalsal azaab jhelā hai
ashk lagne lage haiñ paanī se

lamha lamha kisī kī yādeñ thiiñ
roz-o-shab the magar azaab ke the

chashm-e-tar hai koī sarāb nahīñ
dard-e-dil ab koī azaab nahīñ

āñkheñ asīr-e-ḳhvāb thiiñ ḳhvāb ek hī se the
har ek jaañ pe ab ke azaab ek hī se the

marnā bhī nahīñ hai apne bas meñ
jiinā bhī azaab ho gayā hai

zindagī ke udaas lamhoñ meñ
aur kitne azaab ā.eñge

shauq-e-savāb kuchh nahīñ ḳhauf-e-azāb kuchh nahīñ
jis meñ na josh-e-johd ho us kā shabāb kuchh nahīñ

na ġham-e-azāb-o-savāb se kabhī chheḌ fitrat-e-ishq ko
jo azal se mast-nigāh hai use nek-o-bad kī ḳhabar bhī hai

tū zamāñ makāñ se guzar bhī jā tū rah-e-adam ko bhī kaaT le
vo savāb ho ki azaab ho kahīñ zindagī se mafar bhī hai

koī bhī ḳhud ko badaltā nazar nahīñ aatā
azaab aa.egā Taltā nazar nahīñ aatā

tū ye na pūchh mire gaañv meñ haiñ ghar kitne
ye pūchh kaun se ghar meñ azaab kitne haiñ

nahīñ hai dozaḳh kā dil ko kuchh ġham mirī bhī sun nāsehā zarā tham
rahīm vo pur-gunāh haiñ ham azaab kaisā savāb kaisā

bin dekhe us ke jaave rañj o azaab kyuuñ kar
vo ḳhvāb meñ to aave par aave ḳhvāb kyuuñ kar

unheñ bhī sahne paḌe the azaab mausam ke
chale the apne saroñ par jo sā.ebāñ le kar

sāmne hai sā.at-e-āḳhir kā an-dekhā azaab
umr-bhar kahte rahe ab be-navā ho jā.eñge

sar-e-rāh mil ke bichhaḌ ga.e thā bas ek pal kā vo hādsa
mire sehn-e-dil meñ muqīm hai vahī ek lamha azaab kā

kyā hogī falāh ba.ad-e-murdan
jiite to sadā azaab dekhā

ik din ye jī meñ aa.ī vo āñkheñ hī phoḌ duuñ
jin ke liye azaab uThānā paḌā mujhe

vaa.iz piye hue huuñ ḳhudā ke liye na chheḌ
dhaḌkā miTā huā hai azaab o savāb kā