ruḳh zulf meñ be-naqāb dekhā
maiñ tīra-shab āftāb dekhā
mahrūm hai nāma-dār-e-duniyā
paanī se tahī habāb dekhā
surḳhī se tire laboñ kī ham ne
ātish ko miyān-e-āb dekhā
qāsid kā sar aayā us galī se
naame kā mire javāb dekhā
jaanā ye ham ne vafāt ke ba.ad
dekhā jo jahāñ meñ ḳhvāb dekhā
aafat kā nishāna ho chukā thā
maiñ dil kī taraf shitāb dekhā
ik vaz.a nahīñ mizāj-e-ma.ashūq
gah lutf o gahe itaab dekhā
āñkhoñ se bahāreñ guzrīñ kyā kyā
kis kis kā na maiñ shabāb dekhā
kal mai-kade meñ baġhair saaqī
auñdhā qadah-e-sharāb dekhā
kiiñ us ne jafā.eñ be-hisābī
ik din na kabhū hisāb dekhā
siine se nikal paḌā na āḳhir
dil kā mire iztirāb dekhā
kyā hogī falāh ba.ad-e-murdan
jiite to sadā azaab dekhā
ābādī hai us kī 'mus.hafī' kam
aalam ke ta.iiñ ḳharāb dekhā