jab bhī barsī azaab kī bārish
raas aa.ī sharāb kī bārish
maiñ ne pūchhā ki pyaar hai mujh se
us ne kar dī gulāb kī bārish
maiñ ne to ik savāl pūchhā thā
us ne kar dī javāb kī bārish
husn vāloñ ke vāste kar de
ai ḳhudā tū hijāb kī bārish
shā.irī par yaqīñ hai barsegī
ek din to ḳhitāb kī bārish
maiñ ne ik jaam aur māñgā thā
us ne kar dī hisāb kī bārish
der tak saath bhīge ham us ke
ham ne yuuñ kāmyāb kī bārish
pyaar se rok dī 'ahad' maiñ ne
aaj us ke itaab kī bārish