kitāb-e-shauq meñ in band baab āñkhoñ ko
na sahl jaan mirī jaan ḳhvāb āñkhoñ ko
maiñ ab bhī paḌhtā huuñ taz.īn-e-sher-o-fan ke liye
tamām raat tirī ḳhush-nisāb āñkhoñ ko
qalam amānat-e-haq thā so likh diyā maiñ ne
shagufta lams laboñ ko sharāb āñkhoñ ko
ye fāsloñ kī haqīqat ye qurbatoñ kā tilism
azaab haiñ ye ta.alluq ke ḳhvāb āñkhoñ ko
ḳhamoshiyoñ kī bhī apnī zabān hotī hai
ki mil hī jaatā hai 'āsim' javāb āñkhoñ ko