Tags-Azaab

agar azaab se nikle to ye bhī dekheñge
zamīñ ke kaun se hisse se āsmāñ niklā

uThā.e phirte haiñ kab se azāb-e-dar-badrī
ab is ko vaqf-e-rah-e-yār karnā chāhte haiñ

tamām umr kī lā-hāsilī azaab huī
vo mil gayā hai to apnā nishāñ nahīñ miltā

azāb-e-dānish-e-hāzir se bā-ḳhabar huuñ maiñ
ki maiñ is aag meñ Daalā gayā huuñ misl-e-ḳhalīl

nāliyoñ meñ gir rahe haiñ log pī pī kar sharāb
mulk meñ shāyad nahīñ un ke liye koī azaab

dil meñ hai kyā azaab kahe to pata chale
dīvār ḳhāmoshī kī Dhahe to pata chale

sukūñ se rahte haiñ kis tarah log duniyā meñ
mire liye to ye sāñseñ bhī ik azaab rahīñ

hujūm-e-yās meñ jiinā bhī ik azaab huā
yahī huā ki mohabbat meñ dil ḳharāb huā

samajh rahe haiñ sab yahāñ hai zindagī azāb-e-jāñ
magar ye bhāg-dauḌ hai isī azaab ke liye

na pūchhiye ki kahā kyā hai an-kahī kyā hai
azaab jhel rahā huuñ suḳhanvarī kyā hai

sāqiyā paiham pilā de mujh ko mālā-māl jaam
aayā huuñ yaañ maiñ azāb-e-hoshyārī khīñch kar

na kuchh samajh meñ jo aa.e dil kī to ro paḌūñ maiñ
ki hijr meñ ye guzarte lamhe azaab likkhūñ

har ek samt ret ret par havā ke naqsh haiñ
yahāñ to dasht dasht meñ havāoñ kā azaab hai

ek sab aag ek sab paanī
dīda-o-dil azaab haiñ donoñ

marnā azaab thā kabhī jiinā azaab thā
merā mushīr ishq sā ḳhāna-ḳharāb thā

alāhada kar ke ḳhud se mujh ko jo tū ne baḳhshā to ḳhaak baḳhshā
agarche jannat mujhe milī hai ilāhī phir bhī azaab meñ huuñ

maiñ apne ḳhilāf ho gayā huuñ
nāzil huā ye azaab kaisā

to tai huā nā ki jab bhī likhnā rutoñ ke saare azaab likhnā
ujaaḌ mausam maiñ tapte sahrā ko aab likhnā habāb likhnā

ye us ke qurb kī pādāsh meñ 'suḳhan' ham ko
nasīb hijr huā hai azaab kī sūrat

shab-e-firāq kuchh is tarah mutma.in huuñ 'ziyā'
ki jaise dīda-o-dil par azaab koī nahīñ