Tags-Azaab

taaza tasalliyoñ se purāne savāl kar
shā.ista-e-azāb zarā dekh bhaal kar

ai shab-e-furqat na kar mujh par azaab
maiñ ne terā muñh nahīñ kaalā kiyā

azaab TuuTe diloñ ko har ik nafas guzrā
shikasta-pā the garāñ muzhda-e-jaras guzrā

hamesha jis kī havas ko thī ārzū-e-bahisht
usī kī ruuh rahī thī azaab meñ likhnā

duniyā kī āb-o-tāb se aage chale ga.e
ham ishq ke azaab se aage chale ga.e

'riñd' ab sukūñ kahāñ
hai azaab jaan kam

ta.ajjub hai ki maiñ jāñ-soḳhta zinda rahā kyuuñ kar
judā.ī thī jahannum kā azaab avval se āḳhir tak

aao āñkhoñ meñ Daal do āñkheñ
ruuh ab naza.a ke azaab meñ hai

ramaq ek jān-e-vabāl hai koī dam jo hai to azaab hai
dil-e-dāġh gashta kabāb hai jigar gudāḳhta aab hai

nahīñ hai fursat yahīñ ke jhagḌoñ se fikr-e-uqbā kahāñ kī vaa.iz
azāb-e-duniyā hai ham ko kyā kam savāb ham le ke kyā kareñge

ik umr ho ga.ī hai ki maiñ jāñkanī meñ huuñ
aisī Thahar ga.ī hai ye saa.at azaab kī

ham ko azāb-e-dahr se miltī nahīñ najāt
tum bhī bahisht-e-jism ko vīrāna kar chale

bas ek abr ke saa.e ne aa liyā mujh ko
azaab oḌh ke ghar se nikal rahā thā maiñ

ham Tālte rahe ki ye naubat na aane paa.e
phir hijr kā azaab zarūrī sā ho gayā

kabhī azaab kabhī ek tāziyāna hai
hamārā duur guzishta kā shāḳhsāna hai

baḌe ġhazab kā hai yaaro baḌe azaab kā zaḳhm
agar shabāb hī Thahrā mire shabāb kā zaḳhm

'asrār' mubtalā hue ik din azaab meñ
ya.anī giraft-e-zāhid-e-izzat-ma.āb meñ

pahan lī karb kī poshāk rāh-e-hastī meñ
ham apne vāste ḳhud hī azaab le ke chale

azāb-e-hashr kā kyā zikr ham se ai vaa.iz
ham is balā ko yahīñ aazmā ke baiThe haiñ

dāġh-e-jigar ko le kar jā.eñge ham jo ai dil
jannat meñ hūriyoñ ko rahnā azaab hogā