Tags-Azaab

tere jalāl ke munkir to chand ek haiñ lekin
tere azaab ne sab ko be-kal kar rakkhā hai

mujh ko ma.alūm hai mahbūb-parastī kā azaab
der se chāñd nikalnā bhī ġhalat lagtā hai

mire jism-o-jāñ pe usī ke saare azaab saare savāb haiñ
vahī ek harf-e-ḳhud-āgahī ki abhī jo maiñ ne kahā nahīñ

azāb-e-hijr bhī hai rāhat-e-visāl ke saath
milī to haiñ mujhe ḳhushiyāñ magar malāl ke saath

hameñ ḳhud meñ chhupā liije
ye merā vo azāb-e-jāñ hai jo mujh ko

jo dil ko hai ḳhabar kahīñ miltī nahīñ ḳhabar
har sub.h ik azaab hai aḳhbār dekhnā

aa.e kuchh abr kuchh sharāb aa.e
is ke ba.ad aa.e jo azaab aa.e

hijr kī aag meñ azaab meñ na de
misl-e-sīmāb iztirāb na de

ye merā dil mirī āñkheñ ye mere ḳhvāb azaab
uThā ai ishq tujhe jo bhī hai ḳhirāj pasand

visāl-o-hijr ke qisse na yuuñ sunāo hameñ
ab is azāb-e-shab-o-roz se bachāo hameñ

azaab aa.e the aise ki phir na ghar se ga.e
vo zinda log mire ghar ke jaise mar se ga.e

ḳhayāl rakhnā ajal āḳhirī paḌāv nahīñ
azāb-e-umr se bāhar nikal sako to chalo

hamārī jaan pe dohrā azaab hai 'mohsin'
ki dekhnā hī nahīñ ham ko sochnā bhī hai

ab rahegā ziist meñ lamha-ba-lamha ik azaab
ab khulegā ik fusūñ manzar-ba-manzar raat bhar

maiñ koī giit huuñ magar sadā kī bandishoñ meñ huuñ
mire lahū meñ raag hai sam-e-azāb kī tarah

dil bhī hai andarūn-e-sīna azaab
sar sar-e-dosh ik vabāl bhī hai

azaab jin kā tabassum savāb jin kī nigāh
khiñchī huī haiñ pas-e-jāñ ye sūrateñ kaisī

vo lamha kitnā ajiib thā jab hamārī āñkheñ gale milī thiiñ
maiñ kis tarah ab mohabbatoñ kī shikastagī ke azaab likkhūñ

butoñ kī chaah meñ ham to azaab hī meñ rahe
shab-e-firāq kaTī roz-e-intizār aayā

vo ek tā.ir-e-be-par azaab meñ jal kar
sab hijratoñ kī masāfat guzār aayā hai