Tags-Kitab

zamīñ kī baat zamīñ kī zabāñ meñ kahnā thī
ham āsmān se koī kitāb lā na sake

koī kitāb jo kholeñ to kyā paḌheñ 'fāḳhir'
khulīñ nigāh meñ chehre agar kitābī se

saath le kar kitāb yādoñ kī
ek lambe safar pe nikle haiñ

paḌhiye sabaq yahī hai vafā kī kitāb kā
kāñTe karā rahe haiñ ta.āruf gulāb kā

koī charāġh na jugnū na aa.ina na kitāb
ye kaisā ḳhvāb mirī aañkh par utārā hai

kyā kahe vo ki sab huvaidā hai
shaan terī tirī kitāb ke biich

iqlīm-e-āshiqī ko diyā dīn-e-shā.irī
ham sāhib-e-kitāb the garche nabī na the

tamām lafzoñ meñ raushan har ik baab meñ maañ
junūñ ke shelf meñ hai ishq kī kitāb meñ maañ

hāl-e-dil sun ke bol uThā qāsid
yaad kis ko ye sab kitāb rahe

ḳhudā-e-arsh-e-suḳhan se huuñ faizyāb 'kalīm'
ki tūr-e-sher se laayā huuñ maiñ kitāb bhī saath

thā zabt bahut mushkil is sail-e-ma.ānī kā
kah Daale qalandar ne asrār-e-kitāb āḳhir

jo paḌh sako to ḳhulūs paḌh lo mirī nigāhoñ kī sādgī meñ
jahāñ meñ 'afshāñ' se log kam haiñ hoñ jin ke sachchī kitāb chehre

kitāb-e-shauq meñ in band baab āñkhoñ ko
na sahl jaan mirī jaan ḳhvāb āñkhoñ ko

kutub ke Dher meñ na ho sahīfa zikr-e-yār kā
to qābil-e-mutāli.a kitāb ek bhī nahīñ

gaahe gaahe ise paḌhā kījiye
dil se behtar koī kitāb nahīñ

yaar bad-mast huā sab pe chhiḌaktā hai sharāb
tah kar ai vā.iz-e-shahr apnī kitāb aaj ke din

kāġhaz meñ dab ke mar ga.e kiiḌe kitāb ke
dīvāna be-paḌhe-likhe mash.hūr ho gayā

kitāb-e-zīst ḳhudā-rā koī ġhazal bhī sunā
shikast-e-jāñ kī faqat rūedād ban ke na aa

rakh dī hai us ne khol ke ḳhud jism kī kitāb
saada varaq pe le koī manzar utaar de

har shaḳhs hai ishtihār apnā
har chehra kitāb ho gayā hai