Tags-Kitab

jo paḌhā likhā ham ne vo nazar nahīñ aayā
kitnī be-muravvat hai ye kitāb kī duniyā

kuchh sher shāyad us ko pasand aa ga.e 'kamāl'
hoñToñ ke kuchh nishāñ haiñ tumhārī kitāb meñ

sab naam haiñ durust magar vāqi.a ġhalat
har baat sach nahīñ jo likhī hai kitāb meñ

bāteñ jo thiiñ durust purāne nisāb meñ
un meñ se ek bhī to nahīñ hai kitāb meñ

har ik kitāb nujūmī ġhalat batātā hai
mirī hayāt kā jab zā.icha banātā hai

ka.ī sadā.eñ Thikāna talāsh kartī huī
fazā meñ guuñj rahī haiñ unheñ kitāb karo

kitāb paḌhne kī fursat yahāñ kise 'anjum'
bahut huā to faqat intisāb dekh liyā

vahīñ qabīla-e-murda-zamīr likh denā
hamārā zikr jahāñ bhī kitāb meñ aa.e

jin meñ the mazkūr havāle terī chāhat ke
'nūr' kitāb-e-zīst se vo aurāq nikāl diye

us kī hastī kitāb-e-hastī kā
ik hasīñ intisāb ho jaise

paḌh rahā huuñ nisāb ho jaise
us kā chehra kitāb ho jaise

to aur kyā chāhiye tumheñ ik zamīn de dī kitāb jaisī
aur āsmāñ par kalām kartā huā sitārā banā diyā hai

ab huā sab siiñ fāriġh-ut-tahsīl
be-ḳhudī kī kitāb dekhā huuñ

is tarah paḌhtā huuñ bahte hue dariyā kī kitāb
saf.ha-e-āb par ik aks-e-payām aa.egā

hujūm itnā ho jis kā na ho shumār ki jab
mirī kitāb kā parcham banā ke tū nikle

har ik varaq hai tujh se shurūa is kitāb kā
tū hī batā kahāñ se maiñ ab ibtidā karūñ

insāniyat kī tīrgī ho duur is liye
qānūn kī kitāb meñ jaltā rahā huuñ meñ

mirā dard-e-dil hai ravāñ-davāñ mirā zaḳhm-e-dil bhī gulāb hai
mirī ḳhushbuoñ sī hai dāstāñ ye jahān merī kitāb hai

har kitāb-e-sohbat-e-rañgīñ ke ma.anī dekh kar
fard-e-tanhā.ī ke mazmūñ kuuñ kiyā huuñ intiḳhāb

zabāñ-kushā.ī-e-ġham se khulī kitāb-e-ḳhayāl
varaq varaq pe khulā husn-e-mudda.ā tujh se