Tags-Kitab

zāhidā zohd tū paḌhā, maiñ ishq
hai mirī aur tirī kitāb meñ farq

vafā kī pyaar kī ġham kī kahāniyāñ likh kar
sahar ke haath meñ dil kī kitāb detā huuñ

lailā ne ḳhud qarār diyā hai vafā ko jurm
majnūñ ne vo kitāb-e-mohabbat paḌhī nahīñ

kitāb-e-zindagī zer-e-nazar thī
hadīs-e-dil-barāñ maiñ dekhtā kyā

kitāb-e-zīst kā unvān ban ga.e ho tum
hamāre pyaar kī dekho ye intihā sāhab

maiñ kitāb-e-ḳhāk kholūñ to khule
kyā nahīñ maujūd kyā maujūd hai

ma.alūm nahīñ ki apnā dīvāñ
hai marsiya yā kitāb kyā hai

āñsuoñ ke chand qatroñ se thī tar puurī kitāb
har varaq par ek sūrat mā.el-e-guftār thī

kitāb-e-hāl kā koī varaq nahīñ palTā
kitāb-e-ahd-e-guzishta bhī kab paḌhī yaaro

'munīr' terī ġhazal ajab hai
kisī safar kī kitāb jaisī

jinheñ harf-e-jāñ kī ḳhabar nahīñ vo paḌhāne aa.e kitāb-e-jāñ
jinheñ koī ilm-e-vafā na thā vo sikhāne aa.e vafā mujhe

go paḌhīñ tū ne sau kitāb to kyā
'mus.hafī' ik ḳhat-e-jabīñ ko tū bāñch

mere hāthoñ meñ agar taqdīr-e-sub.h-o-shām ho
titliyāñ ta.abīr kī rakh duuñ kitāb-e-ḳhvāb meñ

vo ajab ghaḌī thī maiñ jis ghaḌī liyā dars nusḳha-e-ishq kā
ki kitāb aql kī taaq par juuñ dharī thī tyuuñ hī dharī rahī

hameñ kaun pūchhe hai sāhibo na savāl meñ na javāb meñ
na to koī aadmī jaane hai na hisāb meñ na kitāb meñ

har lafz mirā hai ek ghaav
zaḳhmoñ kī kitāb ho gayā huuñ

samajh sakā na use maiñ qusūr merā hai
ki mere sāmne to vo khulī kitāb rahā

sab kitāboñ ke khul ga.e ma.anī
jab se dekhī 'nazīr' dil kī kitāb

kitāb-e-māzī ke aurāq ulaT ke dekh zarā
na jaane kaun sā saf.ha muḌā huā nikle