Mohammad Yusuf Rasikh

duniya mein koi ranj se baDh kar KHushi nahin

Mohammad Yusuf Rasikh

duniyā meñ koī rañj se baḌh kar ḳhushī nahīñ
vo bhī hameñ nasīb kabhī hai kabhī nahīñ
dard-e-jigar kī tum pe musībat paḌī nahīñ
tum to kahoge ishq kī manzil kaḌī nahīñ
dushman kī raah rok ke baiThā huuñ aaj maiñ
duniyā kā rāsta hai tumhārī galī nahīñ
dushman kī maut kā tumheñ kyūñkar na ho malāl
ik bā-vafā jahāñ meñ vahī thā vahī nahīñ
shoḳhī kisī kī khul ga.ī āḳhir kalīm par
karne kī thī jo baat vahī un se kī nahīñ
qatroñ ke lab pe shor-e-anal-bahr hai ravāñ
taqlīd kyā ye hazrat-e-mansūr kī nahīñ
īfā-e-ahd hai ki qayāmat kā shor hai
tum khul ke kah na do ki zabāñ ham ne dī nahīñ
lailā ne ḳhud qarār diyā hai vafā ko jurm
majnūñ ne vo kitāb-e-mohabbat paḌhī nahīñ
kaTne ko kaT rahī hai barābar shab-e-firāq
jiine ko jī rahā huuñ magar zindagī nahīñ
tum ko fareb-e-ġhair se āgāh kar diyā
varna mujhe kisī se koī dushmanī nahīñ
rotā hai be-sabātī-e-gulzār-e-dahr par
ġhunche ke lab pe ġhaur se dekho hañsī nahīñ
āñkhoñ ne phuuT phuuT ke sab haal kah diyā
ain-e-visāl meñ bhī yahāñ ḳhāmushī nahīñ
pīr-e-muġhāñ ke faiz se raushan hai mai-kada
sāġhar kā jo murīd nahīñ muttaqī nahīñ
ārām se qafas meñ guzārūñgā zindagī
achchhā huā ki tāqat-e-parvāz hī nahīñ
aatī hai ḳhāk-e-tūr se ab tak yahī ḳhudā
dil kī lagī kā zikr koī dil-lagī nahīñ
āshiq ke dam se husn kī duniyā ko hai faroġh
bulbul nahīñ to raunaq-e-gulzār hī nahīñ
dilbar ke intiḳhāb meñ mujh se ḳhatā huī
merā qusūr hai ye ḳhatā aap kī nahīñ
vahdat kā vo surūr thā saaqī ke jaam meñ
piine ko ham ne pī hai magar be-ḳhudī nahīñ
pūchhā thā bevafā to na paayā raqīb ko
maiñ ne bhī kis maze se kahā hai ki jī nahīñ
khāne ko zaḳhm milte haiñ piine ko ashk haiñ
rozī jahāñ haiñ kyā mirī taqdīr kī nahīñ
āshiq ke zaḳhm dekh ke iisā ne kah diyā
ye to nazar kī choT hai talvār kī nahīñ
tishna-laboñ kī jaan hai shamshīr-e-āb-dār
ḳhvāhish unheñ to kausar-o-tasnīm kī nahīñ
jumbish huī hai dashna-e-ġhamza ko be-sabab
allāh ḳhair ālam-e-asbāb kī nahīñ
jis samt aañkh uThtī hai kushtoñ kā Dher hai
maqtal hai āshiqoñ kā tumhārī galī nahīñ
jannat se kuchh ġharaz hai na duniyā se vāsta
ma.ashūq apnā huur nahīñ hai parī nahīñ
ḳhāna-ḳharāb-e-ishq kī hālat na pūchhiye
koī bhī ġham-gusār ba-juz bekasī nahīñ
inkār ab to is lab-e-nāzuk se ho chukā
pahlī sī shakl ġhuncha-e-ummīd kī nahīñ
tū ḳhāna-zād-e-zulf ko āzād kyuuñ kare
maiñ to tirā ġhulām huuñ maiñ aadmī nahīñ
hūroñ ko bhej kar mirī hālat to pūchhiye
kunj-e-mazār bā.is-e-dil-bastagī nahīñ
ik māh-rū kī yaad ne chamkā diyā hai dil
siina hai daaġh daaġh magar tīrgī nahīñ
tāsīr aah kī kabhī tum ko dikhā.eñge
ham haiñ to gumbad-e-falak-e-chambarī nahīñ
bārish hī ko ulaT ke banā do na tum sharāb
tum ko zarā mazāq-e-adab-parvarī nahīñ
rotā hai koī dil ko koī apnā jaan kar
Daaka hai lūT-mār hai ye dilbarī nahīñ
āñkhoñ se qatl karte ho lab se jalāte ho
phir ye kamāl kyā hai jo afsūñ-garī nahīñ
tālib kī aañkh kartī hai ḳhīra shuā-e-husn
parda hai us kā naam ye be-pardagī nahīñ
zamzam haram se aatā hai 'rāsiḳh' ke vāste
vo ḳhāna-e-ḳhudā hai vahāñ kuchh kamī nahīñ
'rāsiḳh' kise sunā.eñ ham apnā bayān-e-ġham
'ġhālib' nahīñ 'anīs' nahīñ 'anvarī' nahīñ
Top Urdushayar.com