Tags-Kitab

malāmateñ ġham-o-ālām fikr māyūsī
ye zindagī hai shikasta kitāb kī sūrat

maiñ lafz-e-ḳhām huuñ koī ki tarjumān-e-ġhazal
ye faisla kisī taaza kitāb par Thahrā

kitāb-e-ishq meñ har aah ek aayat hai
par āñsuoñ ko hurūf-e-muqatti.āt samajh

huuñ muntazir kisī lams-nigāh kā kab se
maiñ ik kitāb kī sūrat kisī dukān meñ huuñ

mirī nazar meñ aa gayā hai jab se ik sahīfa-ruḳh
kashish rahī na dil meñ ab kisī kitāb ke liye

ham pe nāzil huā sahīfa-e-ishq
sāhibān-e-kitāb haiñ ham log

koī pata de us ko merī kitāb-e-jāñ kā
duniyā ke saath vo bhī ik baab ho ga.ī hai

kitāb kholūñ to harfoñ meñ khalbalī mach jaa.e
qalam uThā.ūñ to kāġhaz ko phailtā dekhūñ

koī kitāb is ke ta.iiñ saaf na thī dars kī
aa.e to ma.anī kahe varna paḌhā.ī ravāñ

kahāniyāñ to bahut thiiñ magar likhī na ga.iiñ
kisī ke haath meñ saada kitāb thā maiñ bhī

'afshāñ' kahāñ se laa.eñ vo aslāf kā ḳhulūs
tārīḳh kī kitāb hī nīlām ho ga.ī

likh likh ke ashk o ḳhuuñ se hikāyāt-e-zindagī
ārā.ish-e-kitāb-e-bashar kar rahe haiñ ham

safha safha ek kitāb-e-husn sī khultī jā.egī
aur usī kī lai meñ phir maiñ tum ko azbar kar lūñgā

dard-e-jigar ḳhud apnī davā ho aisā bhī ho saktā hai
yuuñ hī kitāb-e-zar meñ likhā ho aisā bhī ho saktā hai

use paḌh ke tum na samajh sake ki mirī kitāb ke ruup meñ
koī qarz thā ka.ī saal kā ka.ī rat-jagoñ kā udhār thā

kitāb-e-umr kā har baab be-maza ho jaa.e
jo dard maiñ na rahūñ aur daaġh tū na rahe

magar kitāb kī taqrīb-e-rū-numā.ī meñ
kitāb chīḳh rahī thī ki maiñ kitāb nahīñ

ye rañg aur ye navve gram kā paper
adab ke baab meñ aisī koī kitāb nahīñ

kitāb chhap ga.ī chhe rañge title ke saath
tabā.at aur kitābat koī javāb nahīñ

'kamāl' mujh ko na.ī nasl yaad rakkhegī
kitāb-e-zīst kā ik aisā iqtibās huuñ maiñ