Tags-Kitab

paḌheñ to ḳhud ko zamīñ-bos paa.eñ kaj-dastār
mirī kitāb meñ ik iqtibās aisā thā

ye risāla ishq kā hai adaq tire ġhaur karne kā hai sabaq
kabhī dekh is ko varaq varaq mirā siina ġham kī kitāb hai

jo kitāb-e-ishq ke baab the tirī dastaras meñ bikhar ga.e
vo jo ahd-nāma-e-ḳhvāb thā vo mirī nigāh meñ jal-bujhā

na itnā bikhrī thī pahle kitāb-e-hastī bhī
aur itnī tez mire shahr kī havā bhī na thī

urdu zabān kī maiñ vo kohna kitāb huuñ
jis kā vatan meñ koī ḳharīdār bhī nahīñ

mirā kuchh haal kah kar zikr-e-majnūñ karte haiñ āshiq
kitāb-e-āshiqī meñ apnā qissa pesh-ḳhvānī hai

mirā iftiḳhār vafā talak mujhe raas aa na sakā 'adā'
tirā naam jis par likhā rahā vo kitāb aaj bhī saada hai

kaisī dī ye mujhe kitāb-e-ishq
paḌhte paḌhte bikhar gayā koī

uThā.e phirte ho kyā shahr-e-be-basīrat meñ
kise dikhāoge dil kī kitāb rahne do

us ne kitāb khol ke rakh dī hai shelf meñ
merī qabā-e-vasl ko kab mil sakā vajūd

merā bhī zikr thā tire dil kī kitāb meñ
qirtās par nahīñ huuñ magar hāshiye meñ huuñ

kisī kī yaad meñ jaise azaab kī ḳhushbū
bikhar rahī hai varaq se kitāb kī ḳhushbū

mazmūn sūjhte haiñ hazāroñ na.e na.e
qāsid ye ḳhat nahīñ mire ġham kī kitāb hai

ye ḳhāk-o-bād ye zulmat-o-nūr-o-bahr-o-bar
kitāb-e-jāñ meñ ye kis zaat ke havāle the

kitāb-e-umr se sab harf uḌ ga.e mere
ki mujh asiir ko honā hai ham-kalām us kā

gulāb suukh na jaa.e kitāb meñ rakkhā
pas-e-naqāb hī chehra na ḳharch ho jaa.e

hameñ paḌhāo na rishtoñ kī koī aur kitāb
paḌhī hai baap ke chehre kī jhurriyāñ ham ne

kitāb-e-zīst kī ta.abīr marg-e-dil hī to hai
jise sunā to gayā hai abhī paḌhā na gayā

bahut bosīda yādoñ ke varaq jhaḌne bhī lagte haiñ
palaT umr-e-guzishta kī kitāb āhista āhista

tahsīl-e-ulūm-e-ishq karne
tujh mukh kī kitāb ḳhuub hai ḳhuub