Tags-Kitab

kitāb baab ġhazal sher bait lafz hurūf
ḳhafīf raqs se dil par ubhāre mast parī

atā-e-husn thī 'qais' ik jhalak meñ shoḳh ġhazal
kitāb likhtā maiñ us par magar vo phir na milī

lailā ne ḳhud qarār diyā hai vafā ko jurm
majnūñ ne vo kitāb-e-mohabbat paḌhī nahīñ

raushnā.ī meñ kahīñ ghultī hai mauj-e-māhtāb
kyā koī aurāq-e-gul par tab.a kartā hai kitāb

taur-e-ma.anī par bhī ai nā-faham chaḌh saktā hai tū
kyā musannif kī kitāb-e-dil bhī paḌh saktā hai tū

dil se apne pūchh o zindāni-e-ilm-e-kitāb
husn-e-qudarat ko bhī dekhā hai bar-afganda-naqāb

anā-parast hai itnā ki baat se pahle
vo uTh ke band mirī har kitāb kar degā

baḌī farz-āshnā hai sabā kare ḳhuub kaam hisāb kā
phir uḌā ke le ga.ī ik varaq mirī zindagī kī kitāb kā

jo kitāb-e-ishq ke baab the tirī dastaras meñ bikhar ga.e
vo jo ahd-nāma-e-ḳhvāb thā vo mirī nigāh meñ jal-bujhā

lo vo chāh-e-shab se niklā pichhle-pahar piilā mahtāb
zehn ne kholī rukte rukte maazī kī pārīna kitāb

bahut bosīda yādoñ ke varaq jhaḌne bhī lagte haiñ
palaT umr-e-guzishta kī kitāb āhista āhista

zindagī ik kitāb thī phir bhī
log guzre ġhalat sahī kar ke

vo ik kitāb jo mansūb tere naam se hai
usī kitāb ke andar kahīñ kahīñ huuñ maiñ

yūñhī be-sabab na phirā karo koī shaam ghar meñ rahā karo
vo ġhazal kī sachchī kitāb hai use chupke chupke paḌhā karo

ashkoñ meñ piro ke us kī yādeñ
paanī pe kitāb likh rahā huuñ

titlī ke saath aa.ī tirī yaad bhī hameñ
rakkhā huā kitāb meñ par yaad aa gayā

gulāb-rut meñ ye zardiyoñ ke nuqūsh chehre pe dekh lenā
hamāre baare maiñ kuchh na kahnā pa ibratoñ kī kitāb likhnā

vo kitāb-e-husn vo ilm o adab kī tāliba
vo mohazzab vo muaddab vo muqaddas rāhiba

jab mom kī battī na hī Dhabrī nazar aa.ī
ik puurī kitāb ik na.ī copy hī jalā.ī

vo kitāb-e-sulh kā sar-varaq ki miTā.ī kashmakash-e-firaq
vo qatīl-e-ḳhanjar-e-sabr-o-haq ki vatan pe ḳhud ko miTā diyā