lo vo chāh-e-shab se niklā pichhle-pahar piilā mahtāb
zehn ne kholī rukte rukte maazī kī pārīna kitāb
shahr-e-tamannā ke markaz meñ lagā huā hai melā sā
khel-khilaunoñ kā har-sū hai ik rañgīñ gulzār khilā
vo bālak hai aaj bhī hairāñ mela jūñ-kā-tūñ hai lagā
hairāñ hai bāzār meñ chup-chup kyā kyā biktā hai saudā
hoñT tabassum ke aadī haiñ varna ruuh meñ zahr-āgīñ
ghupe hue haiñ itne nashtar jin kī koī ta.adād nahīñ
kaale kos ġham-e-ulfat ke aur maiñ nān-e-shabīna-jū
kabhī chaman-zāroñ meñ uljhā aur kabhī gandum kī bū
kabhī ġhanīm-e-jaur-o-sitam ke hāthoñ khaa.ī aisī maat
arz-e-alam meñ ḳhvār hue ham bigḌe rahe barsoñ hālāt
rāh-navard-e-shauq ko rah meñ kaise kaise yaar mile
abr-e-bahārāñ aks-e-nigārāñ ḳhāl-e-ruḳh-e-dil-dār mile
saarī hai be-rabt kahānī dhuñdle dhuñdle haiñ aurāq
kahāñ haiñ vo sab jin se jab thī pal-bhar kī duurī bhī shaaq
ḳhvāb the ik din auj-e-zamīñ se kāhkashāñ ko chhū leñge
kheleñge gul-rañg shafaq se qaus-e-quzah meñ jhūleñge
ḳhvār hue damḌī ke pīchhe aur kabhī jholī-bhar maal
aise chhoḌ ke uTThe jaise chhuā to kar degā kañgāl
ziist ḳhudā jaane hai kyā shai bhuuk tajassus ashk farār
phuul se bachche zohra-jabīneñ mard mujassam bāġh-o-bahār
duur kahīñ vo koyal kuukī raat ke sannāTe meñ duur
kachchī zamīñ par bikhrā hogā mahkā mahkā aam kā bor
niiñd se ab bhī duur haiñ āñkheñ go ki rahīñ shab-bhar be-ḳhvāb
yādoñ ke be-ma.anī daftar ḳhvāboñ ke afsurda shahāb