Shahzad Qais

radif qafiya bandish KHayal lafz-gari

Shahzad Qais

Lahore, Punjab, Pakistan

1971
radīf qāfiya bandish ḳhayāl lafz-garī
vo huur ziina utarte hue sikhāne lagī
kitāb baab ġhazal sher bait lafz hurūf
ḳhafīf raqs se dil par ubhāre mast parī
kalām aruuz taġhazzul ḳhayāl zauq-e-jamāl
badan ke jaam ne alfāz kī surāhī bharī
salīs shusta murassā nafīs naram ravāñ
dabā ke dāñtoñ meñ āñchal ġhazal uThā.ī ga.ī
qasīda sher musaddas rubā.ī nazm ġhazal
mahakte hoñToñ kī tafsīr hai bhalī se bhalī
majāz qaid muamma shabīh istiqbāl
kisī se aañkh milāne meñ adbiyāt paḌhī
qarīna sarqa ishāra kināya ramz savāl
hayā se jhuktī nigāhoñ meñ jhāñkte the sabhī
bayān ilm-e-ma.ānī fasāhat ilm-e-balāġh
bayān kar nahīñ sakte kisī kī ek hañsī
qayās qaid tanāsub shabīh saj.a nazīr
kalī ko chūmā to jaise kalī kalī se milī
tarannum arz mukarrar sunā.iye irshād
kisī ne suniye kahā bazm jhuum jhuum ga.ī
huzūr qibla janāb aap dekhiye sāhab
kisī kī shaan meñ goyā luġhat banā.ī ga.ī
harīr atlas-o-kamḳhvāb pañkhuḌī resham
kisī ke phuul se talvoñ se shāh-māt sabhī
gulāb ambar-o-raihān motiyā lobān
kisī kī zulf-e-muattar meñ sab kī ḳhushbū milī
kisī ke marmarīñ ā.īne meñ numāyāñ haiñ
ghaTā bahār dhanak chāñd phuul diip kalī
kisī kā ġhamza sharāboñ se chuur qaus-e-quzah
adā ġhurūr javānī surūr ishva-garī
kisī ke shīrīñ-laboñ se udhār lete haiñ
miThās shahd rutab chīnī qand misrī Dalī
kisī ke nuur ko chuñdhiyā ke dekheñ hairat se
charāġh jugnū sharar āftāb phuul jhaḌī
kisī ko chaltā huā dekh leñ to chalte baneñ
ġhazāl mornī maujeñ nujūm abr ghaḌī
kisī kī madh-bharī āñkhoñ ke aage kuchh bhī nahīñ
thakan sharāb davā ġham ḳhumār nīm-shabī
kisī ke saath nahāte haiñ tez bārish meñ
libās gajre ufuq aañkh zulf hoñT hañsī
kisī kā bhīgā badan gul khilātā hai akasr
gulāb raanī kañval yāsmīn champā-kalī
ba-shart-e-fāl kisī ḳhaal par maiñ vāruñgā
chaman pahāḌ daman dasht jhiil ḳhushkī tarī
ye jaam chhalkā ki āñchal bahār kā Dhalkā
sharīr shosha sharāra shabāb shar shoḳhī
kisī kī tursh-ruī kā sabab yahī to nahīñ
achār lemuu. anaar aam TāTrī imlī
kisī ke husn ko bin māñge baaj dete haiñ
vazīr miir sipāhī faqīh zauq-e-shahī
nigāheñ chaar huiiñ vaqt hosh kho baiThā
sadī dahā.ī baras maah roz aaj abhī
vo ġhuncha yakjā hai chūñki varā-e-fikr-o-ḳhayāl
palak na jhapkeñ to dikhlā.ūñ pattī pattī abhī
siyāh zulf ghaTā jaal jaadū jañg jalāl
fusūñ shabāb shikāran sharāb raat ghanī
jabīn charāġh muqaddar kushāda dhuup sahar
ġhurūr qahr ta.ajjub kamāl nuur bharī
zarīf abrū ġhazab ġhamza ġhussa ġhaur ġhazal
ghamanD qaus qazā ishq tanz niim saḳhī
palak fasāna sharārat hijāb tiir duā
tamannā niiñd ishāra ḳhumār saḳht thakī
nazar ġhazāl mohabbat naqāb jhiil ajal
surūr-e-ishq taqaddus fareb-e-amr-o-nahī
nafīs naak nazākat sirāt adl bahār
jamīl sutvāñ mo.attar latīf ḳhushbū rachī
gulābī gaal shafaq seb surḳhī ġhāza kañval
tilism chaah bhañvar naaz sharm narm-garī
do lab aqiiq guhar pañkhuḌī sharāb-e-kuhan
lazīz naram mulā.em sharīr bhīgī kalī
nashīlī ThoḌī tabassum tarāzū chāh-e-zaqan
ḳhamīda ḳhandāñ ḳhajista ḳhumār patlī galī
galā surāhī navā giit soz aah asar
tarañg chīḳh tarannum tarāna sur kī laḌī
hathelī reshmī nāzuk malā.ī narm latīf
hasīn marmarīñ sandal safed duudh dhulī
kamar ḳhayāl maTaktī kalī lachaktā shabāb
kamān TūTtī añgḌā.ī hashr jān-kanī
parī ke paaoñ gulābī gudāz raqs-parast
taḌaptī machhliyāñ mehrāb-e-lab thiraktī kalī
janāb dekhā sarāpā gulāb marmar kā
abhī ye sher the sheroñ meñ chāñd utrā kabhī
ġhazal huzūr bas apne talak hī rakhiyegā
vo ruuTh jā.egā mujh se jo us kī dhuum machī
jhukā ke nazreñ koī bolā iltimās-e-duā
uThā ke haath vo ḳhairāt-e-husn dene lagī
kashish se husn kī chandā meñ uThe madd-o-jazr
kisī ko saañs chaḌhā sab kī saañs phuul ga.ī
jo us pe buuñd girī abr kapkapā uTThā
is ek lamhe meñ kaafī gharoñ pe bijlī girī
qayāmat aa ga.ī ḳhushbū kī kaliyāñ chīḳh paḌīñ
gulāb bolā nahīñ ġhāliban vo zulf khulī
tavāf kartī hai ma.asūmiyat yuuñ kamsin kā
ki qatl kar de adālat meñ bhī to saaf barī
badan pe hāshiya likhnā nigāh par tafsīr
muqallidīn haiñ shoḳhī ke apnī shaiḳh ka.ī
tamām shahar meñ sīna-ba-sīna phail ga.ī
kisī ke bhīge laboñ se vabā-e-tishna-labī
gulāb aur aisā ki tanhā bahār le aa.e
bahisht meñ bhī hai gunjān shoḳh gul kī galī
kamāl-e-lailā to dekho ki sirf naam liyā
''phir us ke ba.ad charāġhoñ meñ raushnī na rahī''
gulābī āñkhoñ meñ aise bhañvar the mastī ke
sharāb Duub ke un meñ bahut halāl lagī
jasārat aks pe lab rakhne kī nahīñ karte
bahut huā bhī to palkoñ se gudgudī kar dī
na jaane pahlī nazar kyuuñ halāl hotī hai
kisī ke husn pe pahlī nazar hī mahñgī paḌī
chaman meñ ''phūl na toḌeñ'' likhā thā so ham ne
gulāb-zādī ko pahnā dī titliyoñ kī laḌī
kisī kā zulf ko lahrā ke chalnā uf tauba
sharāb-e-nāb azal ke nashe meñ mast parī
vo boltā hai to kānoñ meñ shahd gholtā hai
marīz-e-qañd pe qadġhan hai us ko sunñe kī
kalī ko chhoḌ ke naqsh-e-qadam pe baiTh ga.ī
qalam hilā.e binā titlī ne ġhazal kah dī
sanam aur aisā ki but us ke aage jhuk jaa.eñ
duā dī us ne to do deviyoñ kī god bharī
atā-e-husn thī 'qais' ik jhalak meñ shoḳh ġhazal
kitāb likhtā maiñ us par magar vo phir na milī
Top Urdushayar.com