Tags-Charagh

charāġh bhī mirā chehra hai shab bhī merā jism
to phir ye ḳhalq-e-ḳhudā kyuuñ jalā rahī hai mujhe

charāġh bujh bhī chukā raushnī nahīñ jaatī
vo saath saath hai aur bekalī nahīñ jaatī

havā ke zor se pindār-e-bām-o-dar bhī gayā
charāġh ko jo bachāte the un kā ghar bhī gayā

dam ġhanīmat hai to har dam yaad meñ le dam ke ta.iiñ
zikr daa.im 'āfrīdī' ho charāġh-andar-qubūr

dil kā jo zaḳhm thā charāġh banā
āñsuoñ ko chhupā ke dekh liyā

charāġh-e-qurb kī lau se pighal gayā vo bhī
azāb-e-hijr se maiñ kyaa, nikal gayā vo bhī

suno charāġh bujhā do tamām ḳheme ke
mire aziiz shab-e-imtihāñ kī zad meñ haiñ

shaam hote hī sulag jaate haiñ har ghar meñ charāġh
Duub jaate haiñ sitāre to sahar hotī hai

bichhe hue haiñ tasalsul se jalte bujhte charāġh
hujūm-e-lāla-o-gul le gayā kahāñ mujh ko

kahīñ añdhere se mānūs ho na jaa.e adab
charāġh tez havā ne bujhā.e haiñ kyā kyā

mire dāġh-e-dil vo charāġh haiñ nahīñ nisbateñ jinheñ shaam se
unheñ tū hī aa ke bujhā.egā ye jale haiñ tere hī naam se

us ke jaane se mirā dil hai mire siine meñ
dam kā mehmān charāġh-e-saharī kī sūrat

charāġh laao koī āftāb hī DhūñDeñ
ham is qadar kabhī tārīkiyoñ meñ kho.e na the

ham rāt-bhar jaleñ bhī tumheñ raushnī bhī deñ
ham ko charāġh jaisā muqaddar nahīñ milā

sūraj kā gaañv jis kī jatāoñ meñ thī asiir
ai shahr-e-be-charāġh ye vo raat bhī nahīñ

aaj bhī shām-e-ġham! udaas na ho
maañg kar maiñ charāġh laatā huuñ

ye raushnī yūñhī āġhosh meñ nahīñ aatī
charāġh ban ke muñDeroñ pe jalnā paḌtā hai

andhere rāste roke khaḌe haiñ
charāg-e-kārvāñ koī nahīñ hai

visāl-e-yār kī ḳhvāhish meñ aksar
charāġh-e-shām se pahle jalā huuñ

charāġh-e-shola-e-sar huuñ aur havā meñ
sar-e-dīvār-e-jāñ rakkhā huā huuñ