Tags-Charagh

jin hādsoñ kī aag se dāmān-e-dil jalā
mumkin nahīñ charāġh-e-suḳhan bhī jalā na ho

magar charāġh kā saaya abhī vajūd meñ hai
zarūr apne hisāroñ meñ legā nūr-e-dimāġh

maiñ so rahā thā aur mirī ḳhvāb-gāh meñ
ik azhdahā charāġh kī lau ko nigal gayā

ruk ke ik ashk ne kyā kyā na jalāyā ham ko
dil kā sūraj bhī charāġh-e-tah-e-dāmāñ niklā

havā ko āzmāne jā rahe ho
charāġh-e-dil jalāne jā rahe ho

shahr kī be-charāġh galiyoñ meñ
zindagī tujh ko DhūñDtī hai abhī

roġhan charāġh-e-chashm meñ jitnā thā jal chukā
aur shahr-e-jāñ meñ sub.h ke āsār bhī nahīñ

ḳhair agar tum se na jal paa.eñ vafāoñ ke charāġh
tum bujhānā mat jo koī dūsrā raushan kare

vo ik charāg-kada jis meñ kuchh nahīñ thā mirā
jo jal rahī thī vo qindīl bhī parā.ī thī

shumār us kī saḳhāvat kā kyā kareñ ki vo shaḳhs
charāġh bāñTtā phirtā hai chhīn kar āñkheñ

ma.adūm dāġh-e-ishq kā dil se nishāñ huā
afsos be-charāġh hamārā makāñ huā

hamārā farz to jalnā hai sirf mahfil meñ
bhalā charāġh kā ḳhushiyoñ se vāsta kiyā hai

mire vajūd kī miTTī meñ zar nahīñ koī
ye ik charāġh kī lau jagmagā rahī hai mujhe

havā se lenī thī dād-e-mubārazat-talabī
baġhair bhaḌke hī ye kyuuñ charāġh bujhne lage

abhī to dil meñ farozāñ the yād-e-gul ke charāġh
abhī se kyuuñ mire jazboñ ke baaġh bujhne lage

bujhe to dil bhī the par ab dimāġh bujhne lage
havā hai aisī ki saare charāġh bujhne lage

ye āb-o-tāb isī marhale pe ḳhatm nahīñ
koī charāġh hai is aa.ine se bāhar bhī

ho teġh-e-asar zanjīr-e-qadam phir bhī haiñ naqīb-e-manzil ham
zaḳhmoñ se charāġh-e-rāhguzar baiThe haiñ jalā.e zindāñ meñ

safed ho ga.ī mū-e-siyāh ġhaflat chhoḌ
huī hai sub.h koī dam charāġh hastī hai

ajab nahīñ dam-e-īsā se bhī jo gul ho jaate
ki sham-e-sub.h hamārā charāġh-e-hastī hai