ghar kā rasta jo bhuul jaatā huuñ
kyā batā.ūñ kahāñ se aatā huuñ
zehn meñ ḳhvāb ke mahal kī tarah
ḳhud hī bantā huuñ TuuT jaatā huuñ
aaj bhī shām-e-ġham! udaas na ho
maañg kar maiñ charāġh laatā huuñ
maiñ to ai shahr ke hasīñ rasto
ghar se hī qatl ho ke aatā huuñ
roz aatī hai ek shaḳhs kī yaad
roz ik phuul toḌ laatā huuñ
haa.e gahrā.iyāñ un āñkhoñ kī
baat kartā huuñ Duub jaatā huuñ