Tags-Waqt

nigāheñ chaar huiiñ vaqt hosh kho baiThā
sadī dahā.ī baras maah roz aaj abhī

jab un ko tarz-e-sitam aa ga.e to hosh aayā
burā ho dil kā bure vaqt hoshyār kiyā

vaqt se pahle bulā lete haiñ piirī ko uluum
umr se aage nikal jaate haiñ chehre bil-umūm

dam liyā thā na qayāmat ne hanūz
phir tirā vaqt-e-safar yaad aayā

vo ban ke ziist mire paas aa gayā hai 'amar'
ye vaqt mere liye ain marne vaalā hai

kuchh vahm sadd-e-rāh-e-sitam thā ki vaqt-e-zab.h
mere gulū pe ḳhanjar-e-qātil ravāñ na thā

na kyuuñ ā.īna vo dekhā kareñ har vaqt ban ban ke
zamāna hai ye ḳhud-bīnī kā din haiñ un ke jauban ke

vo vaqt na aa.e ki dil-e-zār bhī soche
is shahr meñ tanhā koī ham sā hai ki tum ho

ye shab-e-darāz bhī kaT ga.ī vo sitāre Duube vo pau phaTī
sar-e-rāh ġhaflat-e-ḳhvāb se ab uTho ki vaqt-e-sahar bhī hai

vaqt-e-ruḳhsat mire hamrāh koī kab aayā
aur agar lauT ke aa.e bhī to aañsū aa.e

'qalaq' har vaqt ab hai sāmnā taklīf-e-pīrī kā
javānī luuT kar sab le ga.ī asbāb rāhat kā

jo vaqt-e-qatl us ke la.al-e-shīrīñ kā paḌā partav
pilāyā āb-e-teġh-e-yār ne sharbat shahādat kā

ab paañv musāfir haiñ nafas marhala-e-zīst
ab vaqt ke hāthoñ pe na ḳhuuñ hai na hinā hai

ruḳhsat ke vaqt TuuT gayā jo pahāḌ thā
siine meñ tere paañv ke kañkar luuñ aur gā.ūñ

ye vaqt hai bahā.e hue kā.enāt ko
naddī kī lahroñ se koī jhālar luuñ aur gā.ūñ

aa ki vaqt-e-sukūn-e-marg aayā
naala nā-ḳhush-gavār thā na rahā

raqs kartī haiñ ishāroñ par mire maut-o-hayāt
dekhtī rahtī huuñ maiñ har-vaqt nabz-e-kā.enāt

ittifāq-e-vaqt thā apnā faroġh-e-āshiyāñ
jab koī jugnū chamak uTThā ujālā ho gayā