Tags-Waqt

suune kitne baam hue kitne āñgan be-nūr hue
chāñd se chehre yaad aate haiñ chāñd nikalte vaqt bahut

vaqt-e-marg ye jī meñ guzrā
zindagī apnī bejā guzrī

ham sañjo.e hue rakkhe haiñ tirī yādoñ ko
vaqt aa.e ki jo hai paas javāñ-tar ho jaa.e

yaad aa.egī mujhe be-tarah yaad aa.egī tū
ain vaqt-e-mai-kashī āñkhoñ meñ phir jā.egī tū

kabhī to umr guzar jaatī hai nahīñ aatī
shu.ūr vaqt pe aa jaa.e to ġhanīmat hai

mujhe ma.alūm hai jab vaqt bahtā hai
to phir maujoñ meñ kab vo farq kartā hai

so is ta.alluq meñ jo ġhalat-fahmiyāñ thiiñ ab duur ho rahī haiñ
rukī huī gāḌiyoñ ke chalne kā vaqt hai dhuñdh chhaT rahī hai

ye vaqt aane pe apnī aulād apne ajdād bech degī
jo fauj dushman ko apnā sālār girvī rakh kar palaT rahī hai

ḳhuub gahrī jo lagī choT to ham ne jaanā
vaqt lagtā hai kisī dard ko jaate jaate

ā.īna husn-e-sabīh bhī kyā dekhe ki vo vaqt-e-nazzāra
dam bhar nahīñ jamte shauq-e-nazar ke paañv phisalte rahte haiñ

maiñ zaa.e.a ho chukā huuñ bahut khel khel meñ
ai vaqt ab na aur lagā daav par mujhe

ai vaa.e tire ruḳh pe usī vaqt nazar kī
jab dekh liyā terī nazar aur kahīñ hai

jise jatan se rakhā dil hī dil meñ vaqt-e-junūñ
vo raaz shahr meñ har ek kī zabān pe hai

zindagī se thak ke us kūche meñ huuñ baiThā huā
jaise apne vaqt kā suufī baḌā pahuñchā huā

ajiib vaqt thā is bench par baġhaicha meñ
ki din gayā nahīñ hotā thā raat aatī thī

kaise kaise naam likhe the
vaqt ne māh-o-sāl ke ruḳh par

ġhubār-e-vaqt meñ ab kis ko kho rahī huuñ maiñ
ye bārishoñ kā hai mausam ki ro rahī huuñ maiñ

ye shaam vaqt se pahle chhupā na de sūraj
sunahrī dhuup meñ chunarī bhigo rahī huuñ maiñ

mujhe vo vaqt vo lamhāt yaad ā.eñge
ye nanhe lawn meñ jab titliyāñ uḌā.eñge

rafta rafta tirī har yaad miTī jaatī hai
gard sī vaqt ke chehre pe jamī jaatī hai