Tags-Wahshat

vahshat ko mirī dekh ki majnūñ ne kahā bas
majnūñ niiñ to kyā dāman-e-hāmūñ ne kahā bas

vahshat-e-dil koī shahroñ meñ samā saktī hai
kaash le jaa.e junūñ sū-e-bayābāñ mujh ko

kahūñ maiñ jis se use hove sunte hī vahshat
phir apnā qissa-e-vahshat kahūñ to kis se kahūñ

ilaaj DhūñDh nikāleñge apnī vahshat kā
junūñ-navāz abhī tak isī gumān meñ the

bahār aa.ī hai phir vahshat ke sāmāñ hote jaate haiñ
mire siine meñ dāġhoñ ke gulistāñ hote jaate haiñ

ajiib shaḳhs hai likh kar phir apne dil kā varaq
na jaane kaun sī vahshat meñ moḌtā bhī hai

ik hasīñ ḳhvāb ki āñkhoñ se nikaltā hī nahīñ
ek vahshat hai ki ta.abīr huī jaatī hai

ye mere sāthī haiñ pyāre sāthī magar inheñ bhī nahīñ gavārā
maiñ apnī vahshat ke maqbare se na.ī tamannā ke ḳhvāb dekhūñ

terī zulfoñ kā merī vahshat kā
miltā-jultā hai silsila sā kuchh

dil-e-āzād ko vahshat ne baḳhshā hai vo kāshāna
ki ik dar jānib-e-ka.aba hai ik dar sū-e-but-ḳhāna

garche vahshat kā nahīñ hai koī afsāna judā
par nazar aatā hai sab se tirā dīvāna judā

dāman-e-sahrā se lūñgā mar ke vahshat meñ kafan
ik nayā joḌā pinhā.egī ye uryānī mujhe

purze bhī uḌe haiñ mirī vahshat ke sar-e-rāh
nazroñ meñ hamārī ye tamāshā bhī huā hai

faqat ye vahshat-e-iz.hār hai ilaaj nahīñ
ye bojh yuuñ nahīñ utregā sar se zāhir hai

aaj nau saal puure hue
apnī vahshat manātī huuñ maiñ

koī vahshat-zada zaḳhmī irāda
tabassum ban ke lahrātā rahā hai

jin kī ta.abīr meñ mile vahshat
aise ḳhvāboñ pe baar āñkheñ haiñ

vahshat thī hameñ bhī vahī ghar-bār se ab tak
sar maare haiñ apne dar o dīvār se ab tak

falak-bosī kī ḳhvāhish tā.ir-e-vahshat ko thī
uḌā hai apnī miTTī darguzar kartā huā