Tags-Wahshat

jaane ho ret ke sahrāoñ kā kaisā aalam
jab hai is gulshan-e-sarsabz meñ vahshat aisī

vahshat-e-dil fuzūñ to hai haal mirā zubūñ to hai
ishq nahīñ junūñ to hai us ke asar ko kyā karūñ

ajab Thahrāo paidā ho rahā hai roz o shab meñ
mirī vahshat koī taaza aziyyat chāhtī hai

thā zo.af meñ saudā kisī sahrā-e-junūñ kā
vahshat mire ghar aa ke bulā le ga.ī mujh ko

vo kaun hai jis kī vahshat par sunte haiñ ki jañgal rotā hai
vīrāne meñ aksar raat ga.e ik shaḳhs hai pāgal rotā hai

majnūñ haiñ ham hameñ to is shahr se hai vahshat
shahrī hoñ aur bastī sahrā ho aur ham hoñ

haath meñ patthar na thā chehre pe vahshat bhī na thī
phir vo kyā thā jis pe ham yuuñ qahqaha karte rahe

judā.ī meñ mire dil kī suno kyā ho ga.ī hālat
mire dil meñ hai vahshat bhī baḌī hai be-qarārī bhī

tasavvur se aage taḳhayyul se aage
mire dil kī vahshat kahāñ tak na pahuñchī

vahshat ba-qaid-e-ishq nahīñ muddateñ huiiñ
phirtā huuñ yūñhī chaak garebāñ kiye hue

ab dard bhī ik had se guzarne nahīñ paatā
ab hijr meñ vo pahlī sī vahshat nahīñ hotī

vahshat kā thā naam avval avval
ab to vo junūn ho ga.ī hai

vahshat bhī apnī itnī ta.aqqul pasand hai
dasht-e-junūñ meñ ḳhaak uḌāne se maiñ rahā

ḳhauf ke ba.ad bhī vahshat hī nazar aatī thī
vahshatoñ se bhī pare koī jahāñ hotā thā

chashm-e-giryāñ zarā tham bhī jā ashk meñ dil bhī bah jā.egā
sabr sahrā-e-vahshat ke mātam-garo aas martī nahīñ

tirā dīvāna jab se uTh gayā sahrā-e-vahshat se
bagūle kī tarah se DhūñDhtī zanjīr phirtī hai

fasl-e-gul meñ chhoḌtā mai dekh kar māh-e-siyām
kuchh junūñ mujh ko na thā vahshat na thī saudā na thā

aks ā.īna-ḳhāna se alag rakkhā hai
vahshat-e-zāt ko sahrā se alag rakkhā hai

ho sake to is hisār-e-zāt se bāhar nikal
habs meñ rahne se vahshat aur bhī baḌh jā.egī

dil kī jaulāñ-gah-e-vahshat hai abad se mausūm
naam azal hai mire bhūle hue afsāne kā