Tags-Wahshat

ālam-e-kaun-o-makāñ naam hai vīrāne kā
paas vahshat nahīñ ghar duur hai dīvāne kā

ḳhabar vahshat-asar thī
use aise lagā

tamām shahr pe chhā.ī huī hai ik vahshat
nazar jhapakte hī kaisī badal ga.ī hālat

jab bashar kī dastaras se duur hai hablul-matīñ
dasht-e-vahshat meñ phir ik kāfir kā dāmāñ kyuuñ na ho

kalī jo gul kī chaTak rahī hai tabī.at apnī khaTak rahī hai
jahāñ meñ vahshat bhaTak rahī hai hazār sar ko paTak rahī hai

ye ajab shab hai unheñ sone na do varna 'salīm'
ḳhvāb bachchoñ ke liye vahshat-asar ho jā.eñge

roz vahshat koī na.ī mire dost
is ko kahte haiñ zindagī mire dost

koī vahshat bhī mire dil meñ na thī
koī saudā bhī mire sar meñ na thā

jab nāḳhun-e-vahshat chalte the roke se kisī ke ruk na sake
ab chāk-e-dil-e-insāniyyat siite haiñ to siinā mushkil hai

ḳhū ne tirī afsurda kiyā vahshat-e-dil ko
māshūqī o be-hauslagī tarfa balā hai

hastī adam se hai mirī vahshat kī ik shalañg
ai zulf-e-yār paañv kī tū beḌiyāñ na ho

ye mere sāthī haiñ pyāre sāthī magar inheñ bhī nahīñ gavārā
maiñ apnī vahshat ke maqbare se na.ī tamannā ke ḳhvāb dekhūñ

aap āhū-chashm haiñ aahū nahīñ
ham se vahshat kī na liije aa.iye

kahāñ se laa.eñ ishq itnā ki us tak baar paa.eñ ham
vo ḳhud bairūn-e-sahrā ahl-e-vahshat se nahīñ miltā

ab dard bhī ik had se guzarne nahīñ paatā
ab hijr meñ vo pahlī sī vahshat nahīñ hotī

fart-e-vahshat meñ kahīñ aur nikal aayā huuñ
ghar kā rasta hai ki sahrā nahīñ dekhā jaatā

kabhī to sehn-e-anā se nikle kahīñ pe dasht-e-malāl aayā
hamārī vahshat pe kaisā kaisā uruuj aayā zavāl aayā

hamāre shahr meñ ab har taraf vahshat barastī hai
so ab jañgal meñ apnā ghar banānā chāhte haiñ ham