Tags-Wahshat

zulmateñ vahshat-e-fardā se niDhāl
DhūñDhtī phirtī haiñ ghar ḳhvāboñ kā

tabāh vahshat meñ huuñ maiñ dar dar abhī bigaḌ jaa.e ye banā ghar
jo dil meñ rakkhūñ tujhe sitamgar to dil na rakkhe mujhe kahīñ kā

merī vahshat bhī sakūñ-nā-āshnā merī tarah
mere qadmoñ se bañdhī hai zimmedārī aur kyā

majnūñ ne kahā jaao vahshat unheñ dikhlāo
baiThā huā sahrā meñ be-kār jo maiñ royā

mujhe bhī ḳhud se vahshat ho rahī hai
sabhī jazbe tumhāre so chuke haiñ

ahl-e-vahshat se ye taz.īn-e-jahāñ kyā hotī
ye salīqa bhī tire gesū-e-barham se milā

jin añdheroñ se tumheñ har-vaqt vahshat hai ḳhayāl
un añdheroñ tak tumhārī dāstāñ le jā.ūñgā

vahshat meñ DhūñDtā hī rahā qais umr bhar
gum ho ga.iiñ bagūloñ meñ mahmil kī dhaḌkaneñ

ek vahshat hī matā.a-e-ġham-e-jānāñ niklī
lutf-e-dildārī-e-ġham-ḳhvār bhī baaqī na rahā

añdherī raat meñ ik dasht-e-vahshat zindagī niklī
chalā jaatā huuñ dāmān-e-nazar detā ujāloñ ko

raat āñkhoñ meñ mirī gard-e-siyah Daal ke vo
farsh-e-be-ḳhvābī-e-vahshat pe sulātā hai mujhe

ab to vahshat sī Tapaktī hai har ik manzar se
soz-e-hijrāñ kī tapish se haiñ sulagtī āñkheñ

al-madad ai raqs-e-vahshat aaj mar jā.eñge ham
ai junūñ is be-sabab tanhā.ī ke tanhā ilaaj

na hai ye kaam vahshat kā na harkat dast-e-vahshat kī
galā ghoñTā hai dīvāne kā ḳhud us ke garebāñ ne

merī muTThī meñ hai har ḳhvāb kī ta.abīr magar
tū ne ai vahshat-e-dil kab mujhe mohlat dī hai

savād-e-shām na rañg-e-sahar ko dekhte haiñ
bas ik sitāra-e-vahshat-asar ko dekhte haiñ

ajab shai hai ḳhushī bhī sun ke vasl-e-yār kā muzhda
marīz-e-hijr ke chehre pe vahshat aa hī jaatī hai

ham dasht-e-be-karāñ kī azaañ ho ga.e to kyā
vahshat meñ ab kī baar ziyāñ ho ga.e to kyā

phūle nahīñ gul chaman ke andar
vahshat āñkheñ dikhā rahī hai

be-dhaḌak aa.e na zindāñ meñ nasīm-e-vahshat
mast kar detī hai zanjīr kī āvāz mujhe