Tags-Wahshat

havā-e-vahshat-e-dil tez chal rahī hai bahut
ridā-e-hijr mirā sar khulā na rah jaa.e

ham kabhī ishq ko vahshat nahīñ banñe dete
dil kī tahzīb ko tohmat nahīñ banñe dete

sahrā meñ ThanDe vaqt hameñ yaad aa.ī jo us kī jalvagarī
kuchh aisī huī vahshat dil ko dam jā ke zer-e-bām liyā

tujh bin ai vahshat-e-junūn-e-bahār
ḳhush lage hai ye baaġh o raaġh kise

ye raqs-e-balā sāz-e-junūñ-ḳhez pe 'az.har'
ye mahfil-e-hañgāma-e-vahshat hai sahar tak

ālam-e-hū dil-e-bīnā ko nazar aa.egā
hasrat o vahshat o hairat se guzar jā.eñge ham

phir ḳhuun meñ vahshat raqsāñ hai tajdīd sitam karne ke liye
ik taaza zaḳhm kī ḳhvāhish hai ik sadma kam karne ke liye

sarhad-e-ishq se aage na baḌhī vahshat-e-ishq
husn-e-hushyār ko dīvāna banāyā na gayā

vahshat-e-dil ne hijābāt-e-jahāñ chaak kiye
ek parda ruḳh-e-jānāñ se uThāyā na gayā

mil gayā to vahshat kī
dāstāñ sunānī hai

tanhā.iyoñ se mujh ko rifāqat sī ho ga.ī
'ārif' siyāh shab se bhī vahshat nahīñ mujhe

vahshat-e-dil ne hameñ chain se jiine na diyā
chashm giryāñ kabhī jaañ shola-fishāñ rakhte haiñ

dasht-e-vahshat meñ uḌe phirte haiñ ārām se ham
jo sifat zo.af meñ hai taḳht-e-sulaimāñ meñ nahīñ

vahshat-e-ishq ko sābit-qadamī bhī hai zarūr
qais kā naqsh-e-qadam tak to bayābāñ meñ nahīñ

vo to vahshat meñ kabhī samjhe hai mujh ko qātil
aur kabhī kūcha-e-qātil kā patā māñge hai

be-yaqīnī kā har ik samt asar jāgtā hai
aisī vahshat hai ki dīvār meñ dar jāgtā hai

apne vahshat-zada kamre kī ik almārī meñ
terī tasvīr aqīdat se sajā rakkhī hai

kisī ma.asūm par be-dād kā ilzām kyā ma.anī
ye vahshat-ḳhez bāteñ ishq-e-bad-anjām rahne de

zindagī ishq kī vahshat-bharā afsāna thī
mere hāthoñ meñ vo ik zahr kā paimāna thī

maiñ is tarah se kūcha-e-vahshat kī ho ga.ī
mallāh jis tarah se samundar ke ho ga.e