Tags-Andhera

apne mustaqbil ko raushan karne nikle the magar
shahr kā sūraj to āñkhoñ ko añdherā de gayā

kuchh bhī ho us se judā.ī kā sabab ghar jaao
Dhal chukī shaam añdherā huā ab ghar jaao

añdherā baḌh rahā thā umr kī kachchī saḌak par
safar lāzim thā so raftār ko kam kar diyā thā

gire galiyoñ ke qadmoñ par añdherā
fazā meñ raushni-e-bām ubhre

kisī ḳhayāl kī mish.al kisī sadā kā charāġh
har ek samt añdherā dikhā.ī detā hai

añdherī raat se Dartā hai mīr-e-kārvāñ ho ke
añdherā hai to apne dāġh-e-dil kī raushnī phailā

vo shab kī sāñseñ ukhaḌ rahī haiñ vo laḌkhaḌāne lagā añdherā
uTho musībat-kasho uTho bhī uTho ki hone ko hai saverā

parbatoñ ke peḌoñ par shaam kā baserā hai
surma.ī ujālā hai champa.ī añdherā hai

is baar añdherā mire nas nas meñ bharā hai
is baar charāġhoñ se shikāyat bhī baḌī hai

maiñ raushnī huuñ añdherā huuñ dard huuñ kyā huuñ
mire vajūd se mujh ko nikāl kar dekho

āshob-e-judā.ī kyā kahiye an-honī bāteñ hotī haiñ
ā.ankhoñ meñ añdherā chhātā hai jab ujālī rāteñ hotī haiñ

ummīd kā sūraj Duubā hai ā.ankhoñ meñ añdherā chhāyā hai
duniyā-e-firāq meñ din kaisā rāteñ hī rāteñ hotī haiñ

gul-rañg charāġhoñ kī lau se tārīk ujāle phuuT bahe
har taaq meñ ghor añdherā hai is rañg-mahal ko Dhaao bhī

raushnī had se ziyāda na baḌhe
sāmne mere añdherā na karo

ġhāfil tirī āñkhoñ kā muqaddar hai añdherā
ye farsh to rāhoñ meñ bichhāne ke liye hai

bāhar andar talḳh añdherā kis ko DhūñDne nikle ho
jot jalā aate chaukhaT par kuchh to Dhāras paate hī

badan par raushnī oḌhī hai sab ne
añdherā ruuh tak phailā huā hai

ujālā kaam par hai pau phaTe se
añdherā chain se soyā huā hai

vo be-tābī mirī har shaam ke mastūr hone tak
tumhārā baam par aanā añdherā nuur hone tak

diye raushan the har jānib añdherā thā magar dil meñ
bahut tanhā thā maiñ lekin sharīk-e-kārvāñ bhī thā