Tags-Andhera

sub.h ke naam se ghabrātā huuñ
jī ko raas aayā añdherā kyuuñ thā

vo raushnī meñ nahāyā huā tasavvur thā
añdherā baḌhtā gayā dast-e-shab nikal aa.e

tujhe mahsūs bhī maiñ kar na pā.ūñ
añdherā hai magar itnā nahīñ hai

diloñ meñ hai añdherā ahd-e-nau kā
ba-zāhir raushnī hī raushnī hai

soch lo maiñ bhī huā chup to girāñ guzregā
ye añdherā jo mire shor o sharar se kam hai

ab bhī galiyoñ meñ mohabbat kī añdherā hai bahut
ek dil aur darīche meñ jalānā mirī jaan

raushnī phailī to sab kā rañg kaalā ho gayā
kuchh diye aise jale har-sū añdherā ho gayā

mujhe be-ḳhvāb rātoñ se koī shikva nahīñ phir bhī
añdherā Dastā hai aur chāñdnī se choT lagtī hai

baap koī bhī musībat nahīñ aane degā
maañ mire dil meñ añdherā nahīñ hone degī

shaam kī zau
har taraf sāhil pe halkā sā añdherā abr kā

jo añdherā terī zulfoñ kī tarah shādāb ho
us añdhere ko ziyā taslīm kar letā huuñ maiñ

ik añdherā huuñ sar se paañv tak
phir ye pahlū meñ kiyā chamaktā hai

kaun uTh kar chalā muqābil se
jis taraf dekhiye añdherā hai

har ek samt añdherā hai hū kā aalam hai
jalāo ḳhuub jalāo nadīm jam ke charāġh

'rāz' ehsās ke āñgan meñ hoñ tanhā tanhā
ghup añdherā hai magar saath haiñ ġham ke saa.e

ḳhamoshiyāñ haiñ añdherā hai be-yaqīnī hai
na ho jo yaad bhī terī to maiñ ḳhalā ho jā.ūñ

añdherā hijr kī vahshat kā raqs kartā hai
tamām raat mirī aañkh ke sitāre par

hameñ ḳhabar hai ki ham haiñ charāġh-e-āḳhir-e-shab
hamāre ba.ad añdherā nahīñ ujālā hai

jab chāroñ-or añdherā thā sach kam thā jhuuT ghanerā thā
dariyā se baḌe ik shaḳhs kā ik dariyā ke kināre Derā thā

kuchh nahīñ hai to ye andesha ye Dar kaisā hai
ik añdherā sā ba-hañgām-e-sahar kaisā hai