Tags-Andhera

tirī nigāh ne thoḌī sī raushnī kar dī
vagarna arsa-e-kaunain meñ añdherā thā

agarche roz-e-azal bhī yahī añdherā thā
tirī jabīñ se nikaltā huā saverā thā

ik haqīqat se ubhar aatā hai har shai kā vajūd
ek jugnū se añdherā bhī chamak jaatā hai

har ek samt añdherā hai dekhiye kyā ho
nikal ke ghar se vo raushan qabā kidhar jaa.e

nahīñ dekhtā din jise chashm-e-shab dekhtī hai
añdherā bhī ik dūsre rañg kī raushnī hai

ik samt añdherā hai to ik samt kaḌī dhuup
hālāt ke ik aise dorāhe pe khaḌā huuñ

janam janam kī siyāhī baras baras kī ye raat
qadam qadam kā añdherā nafas nafas kī ye raat

agar maiñ phoḌ duuñ sūraj kī āñkheñ
añdherā jā-ba-jā ho jā.egā kyā

be-sohbat-e-ruḳhsār añdherā hī añdherā
go jaam vahī mai vahī mai-ḳhāna vahī hai

vo ahl-e-kahaf the jin ko ziyā milī āḳhir
mirā ye daur ki ab tak añdherā ġhaar meñ hai

nashāt-o-alam ke safed-o-siyah ne hamārī nigāhoñ ko hairat meñ Daalā
idhar raushnī hai udhar tīrgī hai kahīñ hai añdherā kahīñ hai ujālā

mere raste meñ jo raunaq thī mere fan kī thī
mere ghar meñ jo añdherā thā mirā apnā thā

go aaj añdherā hai kal hogā charāġhāñ bhī
taḳhrīb meñ shāmil hai ta.amīr kā sāmāñ bhī

baḌhtā jaatā hai añdherā jaise jaadū ho koī
koī paḌh liije duā lekin asar kuchh bhī nahīñ

vo ziyā ko bhī phūñk saktā hai
jo añdherā ziyā kī qaid meñ hai

jaate haiñ dil meñ chhoḌ ke vo jalva-e-ḳhayāl
bujhtī hai sham.a ghar meñ añdherā kiye baġhair

tere chehre pe ujāle kī saḳhāvat aisī
aur mirī ruuh meñ nādār añdherā aisā

ḳhaak se saiñkaḌoñ uge ḳhurshīd
hai añdherā magar charāg-tale

tum bhalā mujh se ḳhafā ho ke kahāñ jāogī
shahr kī galiyoñ meñ is vaqt añdherā hogā

kahīñ āñkheñ kahīñ baazū kahīñ se sar nikal aa.e
añdherā phailte hī har taraf se Dar nikal aa.e