hamārī tarah sadā ik uchhāl kar dekho
javāb kuchh na milegā savāl kar dekho
hasīn shab se jo sharminda ho ke Duub gayā
nadī se aaj vo sūraj nikāl kar dekho
vo apnī zaat thī jo TuuTī aur nahīñ bikhrī
ye aa.ina hai ise tum sambhāl kar dekho
ġharīb dhuup jo bikhrī paḌī hai kamre meñ
sameTo aur na.e sūraj meñ Dhaal kar dekho
maiñ raushnī huuñ añdherā huuñ dard huuñ kyā huuñ
mire vajūd se mujh ko nikāl kar dekho