Tags-Masti

tamāshā hai mirī rindī ki sāġhar haath meñ le kar
har ik se pūchhtā huuñ maiñ kahīñ thoḌī sī mastī hai

na dekh o mah-jabīñ mirī samt itnī mastī-bharī nazar se
mujhe ye mahsūs ho rahā hai sharāb kā daur chal rahā hai

kār-zār-e-dahr meñ har kaif har mastī bajā
kuchh sharīk-e-be-ḳhudī rindāna-e-jur.at bhī to ho

kaif o mastī 'shujā.a' falak tak hai
dard yuuñ qalb meñ machalte haiñ

nainoñ se mastī barsātī lo jaag uThī hastī kī dūlhan
ai sub.h-e-vatan ai sub.h-e-vatan

fāqa-mastī meñ bhī qaa.em hai mirī kaj-kulahī
aur kyā chāhtī hai azmat-e-rafta mujh se

lahakte sabze meñ abr-e-bahār kī mastī
dahakte phuul meñ chhalkī huī sharāb kī aañch

mastī jo lagā kar mujhe bātoñ meñ uḌaao
uḌ jaa.e dhuāñ ban ke ye zulmāt tumhārī

kabhī ġhamza kabhī ishva kabhī shoḳhī kabhī mastī
adā.eñ bāñkpan meñ sandalī paikar banātī haiñ

sakī aaj pyālā anañd kā pilā munj
va yāqūt adhrāñ kī mastī dilā munj

piite haiñ mai gunāh ba-qasd-e-savāb hai
mastī ke valvale haiñ zamān-e-shabāb hai

tab ālam-e-mastī kā mazā hai ki paḌī ho
gardan pe mirī us but-e-maḳhmūr kī gardan

kitnā hushiyār huā kitnā vo farzāna huā
terī mastī-bharī āñkhoñ kā jo dīvāna huā

aa shaiḳh guftagū-e-pareshāñ pe to na jā
mastī meñ ab to qibla-e-hājāt ho ga.ī

shaiḳh tū to murīd-e-hastī hai
mai-e-ġhaflat kī tujh ko mastī hai

javānī ne diye haiñ un ko lā kar ham-nashīñ kyā kyā
adā meñ naaz chitvan meñ hayā āñkhoñ meñ mastī hai

na sahbā hai na sāġhar hai na miinā hai na ḳhum saaqī
mujhe jo mast kartī hai tirī āñkhoñ kī mastī hai

nigāhoñ se milātā huuñ nigāheñ is tamannā meñ
vo mere dil meñ aa jaa.e jo un āñkhoñ meñ mastī hai

tirī āñkhoñ ke sadqe ek duniyā un meñ bastī hai
fusūñ hai sehr hai e.ajāz hai shoḳhī hai mastī hai