Tags-Masti

badal na hosh-e-parastish se masti-e-ulfat
tajalliyoñ pe fareb-e-naqāb rahne de

'nihāl' ko be piye hai mastī hai muft ilzām-e-mai-parastī
hai aam is shahr meñ rivāyat ye shaḳhs kuchh bāda-ḳhvār sā hai

ye kyā ajab ki vahī bahr-e-nīstī meñ girī
nafs kī mauj meñ mastī bhī thī ravānī bhī

aañkh mastī kī bharī shoḳh nigāheñ chanchal
qahr kājal kī khachāvaT misī o paan parī

ishq kī mastī dil kī dhaḌkan
ek javānī do do joban

Tapakne lagī un nigāhoñ se mastī
nigāheñ churāne ke din aa rahe haiñ

is mahfil-e-kaif-o-mastī meñ is anjuman-e-irfānī meñ
sab jām-ba-kaf baiThe hī rahe ham pī bhī ga.e chhalkā bhī ga.e

hai yahī ik kārobār-e-naġhma-o-mastī ki ham
yā zamīñ par yā sar-e-aflāk haiñ chhā.e hue

mirī nigāh meñ vo riñd hī nahīñ saaqī
jo hoshiyārī o mastī meñ imtiyāz kare

ain mastī meñ huuñ dil duniyā se begāna hai
kyūñki ab pesh-e-nazar jalva-e-jānāna hai

khuleñgī āñkheñ nashsha utregā
husn tak uuprī ye mastī hai

terī āñkhoñ se barastī mastī
ek mai-ḳhāna khulā ho jaise

agar sharāb meñ mastī bhī hai ḳhumār bhī hai
to kyuuñ na ārzū-e-chashm nīm-bāz kareñ

mirī mastī meñ bhī ab hosh hī kā taur hai saaqī
tire sāġhar meñ ye sahbā nahīñ kuchh aur hai saaqī

in āñkhoñ kī mastī ke mastāne hazāroñ haiñ
in āñkhoñ se vābasta afsāne hazāroñ haiñ

kaif-e-mastī meñ ki irfān-e-junūñ meñ al-ġharaz
vā har ik band-e-naqāb-e-rū-e-jānāñ kījiye

muddat kī tishnagī kā in.aam chāhtā huuñ
mastī bharī nazar se ik jaam chāhtā huuñ

'shahīdī' itnī gumāñ-parastī nashe meñ sab bhuul baiThe hastī
huī hai us se hī tum ko mastī jo tā-gulū bhī nahīñ ga.ī hai

is chashm-e-nīm-vā kī hai mastī sharāb meñ
sāġhar meñ saare rañg usī kī hayā ke haiñ

lā dalīl-e-ishq-o-mastī darmiyāñ
ḳhatm bahs-e-ḳhair-o-shar ho jā.egī