Tags-Masti

terī āñkhoñ meñ rañg-e-mastī hai
haañ mujhe etibār-e-hastī hai

mire liye na ye mastī na āgahī hai harām
mujhī ko bazm se uThnā thā sar uThānā thā

kachchī miTTī ke 'farhat-ehsās' zarā paanī meñ sambhal kar
dariyā meñ tum ḳhuub nahāte ho jab bhī mastī aatī hai

chaḌh kar saarī sharābeñ jab auqāt pe apnī aa jaatī haiñ
chaḌhtā hai dariyā-e-ḳhūñ aur miTTī ko mastī aatī hai

rañg havā se chhūT rahā hai mausam-e-kaif-o-mastī hai
phir bhī yahāñ se hadd-e-nazar tak pyāsoñ kī ik bastī hai

nashsha-e-yār kā nasha mat pūchh
aisī mastī kahāñ sharāboñ meñ

had-e-idrāk se bāhar haiñ bāteñ ishq o mastī kī
samajh meñ is qadar aayā ki dil kī maut hai duurī

kabhī hairat kabhī mastī kabhī āh-e-sahar-gāhī
badaltā hai hazāroñ rañg merā dard-e-mahjūrī

vo apne husn kī mastī se haiñ majbūr-e-paidā.ī
mirī āñkhoñ kī bīnā.ī meñ haiñ asbāb-e-mastūrī

koī vaa.iz na vazīfa ki koī saum-o-salāt
jaan chhūTe mirī ik baar koī mastī ho

maiñ man-o-tū ke sahīfoñ kī tilāvat karūñgā
be-vazū huuñ mirī sarkār koī mastī ho

chaar samtoñ ne tire hijr ke ghuñghrū bāñdhe
aur ham log bhī haiñ chaar koī mastī ho

mujh ko miTTī ke piyāle meñ pilā taaza sharāb
jism hone lagā be-kār koī mastī ho

be-niyāzāna rahegā tirī duniyā meñ faqīr
ḳhvāb-o-ḳhvāhish nahīñ darkār koī mastī ho

ruuh hāzir hai mire yaar koī mastī ho
halqa-e-raqs hai tayyār koī mastī ho

tere ehsās kī shiddat se bharā baiThā huuñ
ab na inkār na iqrār koī mastī ho

āñkhoñ meñ ik latīf sī mastī bharī huī
nazroñ ko ham-kanār-e-gulistāñ kiye hue