Tags-Masti

ḳhum o miinā mai o mastī ye gulābī āñkheñ
kitnā pur-kaif mire hijr kā afsāna hai

jīvan ke vo pyāse lamhe barsoñ meñ raas aa.e the
raat tirī zulfoñ ke bādal mastī meñ lahrā.e the

but-ḳhāne meñ din kaaTā maiḳhāne meñ shab guzrī
nasha hai na mastī hai kahiye bhī to kyā kahiye

har aañkh meñ mastī hai kahiye bhī to kyā kahiye
aur aap kī bastī hai kahiye bhī to kyā kahiye

nazzāre ne bhī kaam kiyā vaañ naqāb kā
mastī se har nigah tire ruḳh par bikhar ga.ī

aah vo hosh kā aalam vo ġhamoñ kā tūfāñ
uf ye mastī ki hai phir hosh meñ aane kī dalīl

chaal hai mast nazar mast adā meñ mastī
jaise aate haiñ vo TuuTe ho.e mai-ḳhāne ko

Dhaltī hai vo mai ik tire paimāne meñ saaqī
mastī ko bhī jo hosh ke ādāb sikhā.e

bigḌe the bigḌe hī rahe aur umr guzārī mastī meñ
duniyā duniyā karne se jab kuchh na banā ham logoñ kā

kabhū jo ālam-e-mastī meñ tum ne kī thī nigāh
bajā.e aab bahe hai sharāb dariyā meñ

ik rahguzār manzil-e-mastī hai mai-kada
har riñd ko ḳhushī se sharīk-e-safar karo

nazr-e-dil māñgtī haiñ aap kī sarshār āñkheñ
ain mastī meñ rahā kartī haiñ hoshiyār āñkheñ

haa.e ye majmūa-e-sar-mastī-o-kaif-o-ḳhumār
tak rahe haiñ terī āñkhoñ ko liye paimāna ham

kaif-o-mastī surūr kyā ma.anī
zindagī meñ bhī ab ḳhushī kam hai

tujhe kaif-e-mastī meñ ham dekhte haiñ
salāsa nazar kā adam dekhte haiñ

maiñ sar se pā tak huuñ mai-parastī tamām shorish tamām mastī
khulā hai mujh par ye rāz-e-hastī ki mujh ko kuchh bhī ḳhabar nahīñ hai

saare māhaul ko de duuñ kisī tābīr kā vajd
apnī mastī meñ koī ḳhvāb sunā.ūñ maiñ bhī

har nasha thā lahū kī garmī se
ab vo mastī kahāñ sharāboñ meñ

mai kī ik ik buuñd se tūfān-e-mastī hai ayaañ
kis kī mai-bār añkhḌiyoñ kā aks paimāne meñ hai