koī nahīñ ki jise āshnā-e-rāz kareñ
to kyuuñ na phir ġham-e-dil hī se sāz-bāz kareñ
banā ke un ko bhī ḳhūgar niyāz-e-paiham kā
vo din bhī aa.e ki ham bhī butoñ se naaz kareñ
hisāb ho chukā kotāh-dastiyoñ kā to ab
ḳhayāl-e-silsila-e-gesū-e-darāz kareñ
agar sharāb meñ mastī bhī hai ḳhumār bhī hai
to kyuuñ na ārzū-e-chashm nīm-bāz kareñ
nazar meñ tundī-e-tishna-labī baḌhā ai shauq
ki jis se har dil-e-mīnā ko phir gudāz kareñ
huzūr-e-pīr-e-muġhāñ laġhzishoñ kī pursish hai
lo aao apne bhī qadmoñ ko sarfarāz kareñ
safar shabāb kā gar uzr thā to ab sar-e-shām
qazā-e-umr paḌheñ niyyat-e-namāz kareñ