Tags-Kitab

qalam-band haiñ jis meñ rūhoñ ke qisse
kitāb-e-zamāna kā vo baab huuñ maiñ

bayāz-e-dil ke sunahre hurūf bhī chūme
kitāb-e-jāñ pe likhā intisāb bhī jhelā

kitāb-e-zehn kā koī varaq bhī saada nahīñ
likhe hurūf miTāne kā hausla na huā

basta kitāb copy sab chhuTTiyāñ manā.eñ
bār-e-girāñ se in ke ham bhī najāt paa.eñ

'qamar' ajiib hai uslūb-e-ḳhāmushī us kā
bas ik nigāh meñ dil kī kitāb likh denā

vo hairatoñ kī mukammal kitāb likh denā
savāl karne se pahle javāb likh denā

kal raat vo jhagaḌtī rahī baat baat par
aur maiñ kitāb likhtā rahā kā.enāt par

tumhāre hoñToñ pe maiñ ne kitāb likkhī hai
mirī kitāb kā unvāñ gulāb rakkhūñgā

koī kitāb thamā kar ġharīb bachchoñ ko
na.e daraḳhtoñ ke kuchh inqalāb rakkhūñgā

ga.ī rutoñ ko bhī yaad rakhnā na.ī rutoñ ke bhī baab paḌhnā
gulāb-chehroñ ne jo likhī hai tamāzatoñ kī kitāb paḌhnā

maiñ lafz-e-ḳhām huuñ koī ki tarjumān-e-ġhazal
ye faisla kisī taaza kitāb par Thahrā

kitāb sā mirā chehra tirī nigāh meñ hai
bayān kar mirī zaat o sifāt achchhī tarah

tirī zabān pe allāh-hū kā na.ara hai
tire shi.ār meñ allāh kī kitāb nahīñ

ash.ār mere kyā haiñ faqat kuchh ta.assurāt
duniyā agar kitāb hai to hāshiya huuñ maiñ

mirī zindagī kī kitāb meñ yahī naqsh haiñ mah-o-sāl ke
vo shagufta rañg uruuj ke ye shikasta rañg zavāl ke

ye risāla ishq kā hai adaq tire ġhaur karne kā hai sabaq
kabhī dekh is ko varaq varaq mirā siina ġham kī kitāb hai

titlī ke saath aa.ī tirī yaad bhī hameñ
rakkhā huā kitāb meñ par yaad aa gayā

us ne phir pheñk dī baġhair paḌhe
mere dil kī kitāb paanī meñ

tamām shahr ke chehroñ ko paḌhne niklā huuñ
ai mere dost mire haath meñ kitāb na de

har ek lafz meñ rakh kar sarāb ma.anī kā
har ek haath meñ vo ik kitāb de ke gayā